28. október 2020

Endurhönnun Vigtartorgs

Þessa dagana standa yfir framkvæmdir vegna endurhönnunar á Vigtartorgi.

Markmið breytinganna er að skapa líflegt hafnartorg sem kemur til með að verða heillandi samkomustaður. Bætt upplifun og aðgengi gesta Vestmannaeyja að miðbænum fæst með því að skapa tengingu frá hafnarsvæði að miðbæ. Einnig er markmiðið að torgið verði lifandi samkomustaður sem nýta má til ýmissa viðburða en góð reynsla er komin á sjómannadagshátíðarhöld á svæðinu.

Meðal þess sem lagt er til að verði á torginu er einskonar útisvið eða aðstaða fyrir ýmis konar uppákomur, legubekkir, fjölbreytt leiktæki, sögutorg, setbrekka og sölubásar.

Eins og áður sagði þá er vinna hafin en áætlað er að vinna verkið í nokkrum áföngum og eru verklok fyrirhuguð árið 2022.

Það er landslagsarkitektinn Pétur Jónsson frá Laufási sem vinnur að hönnuninni en hann starfar hjá verkfræðistofunni Eflu. Þess má geta að hann hannaði meðal annars Skanssvæðið og útisvæði sundlaugar auk fleiri smærri svæða hér í Vestmannaeyjum.

Tillögu Péturs er hægt að skoða hér.