Bæjarstjórn Vestmannaeyja fundur nr. 1439

Fyrir liggur að að nái stefna ríkisstjórnar gagnvart heilbrigðisþjónustu á landsbyggðinni fram að ganga verður Heilbrigðisstofnun Vestmannaeyja í þeirri mynd sem hún hefur hingað til verið rekin lögð niður. Heildar niðurskurður á fjárlögum nemur 23.78%. Þar af verður niðurskurður á Sjúkra- og hjúkrunarsviði hvorki meira né minna en 37% eða 180 milljónir.

Öllum má ljóst vera að niðurskurði sem þessum verður ekki náð nema með lokun skurðstofu jafnvel þótt að fjárlögunum sé tekið fram að áfram skuli rekin skurðstofa hér í Vestmannaeyjum.

Bæjarstjórn gerir alvarlegar athugasemdir við þá staðreynd að gert er ráð fyrir að draga mjög úr þjónustu við aldraða langlegu sjúklinga og mun sá kostnaður flytjast yfir á sveitarfélagið ef ekkert verður að gert. Nú þegar duga framlög Tryggingastofnunar Ríkisins ekki fyrir nauðsynlegum rekstri Hraunbúða og verða herbergi því að standa auð á meðan aldraðir Eyjamenn bíða eftir úthlutun. Boðaður niðurskurður eykur því á vandann sem er ærinn fyrir. Í þessu samhengi minnir bæjarráð á að kveðið er á um lögfestingu samskiptareglna ríkis og sveitarfélaga í samstarfsyfirlýsingu ríkisstjórnar VG og Samfylkingarinnar. Það fær ekki gengið að flytja kostnað af ríki yfir á sveitarfélög án tekjustofna.

Bæjarstjórn átelur núverandi heilbrigðisyfirvöld einnig fyrir grandvaraleysi í aðdraganda þessara fjálaga. Það samráð sem komið var á með stofnun vinnuhópa um heilsugæslu, sjúkra- og hjúkrunadeilda, sjúkraflutninga og fl. með aðkomu fulltrúa Vestmannaeyinga í lok árs 2008 var illu heilli ekki áfram haldið heldur haldið áfram án aðkomu heimamanna. Hluti af þeirri vinnu var ósk Vestmannaeyjabæjar um að yfirtaka rekstur Heilbrigðisstofnunar Vestmannaeyja í stað þess að sameina í burt þjónustu. Þeirri tillögu var vel tekið af þáverandi ráðherra og markviss vinna þar að lútandi í farvegi. Eftirmenn hafa hinsvegar heitið því að hugmyndir um sameiningu yrðu aflagðar, ólíkt því sem við nú stöndum frami fyrir. Niðurstaðan er áformuð endalok þeirrar heilbrigðisþjónustu sem hingað til hefur verið veitt í Vestmannaeyjum.

Bæjarstjórn hvetur þingmenn suðurlands til að láta einskis ófreistað í baráttunni gegn fyrirhuguðum áformum. Það nálgast hreina ósvífni að leiða slíkan niðurskurð í heilbrigðisþjónustu yfir landsmenn á sama tíma og ráðast á í stjórnlagaþing sem kostar 1,7 milljarð til 2,1 milljarð (skv. mati fjármálaráðuneytisins), setja glerhjúp um menningarhús í Reykjavík fyrir um 3,2 milljarða, ráðast í endurbyggingu Landspítalans sem mun vart kosta undir 50 til 70 milljörðum og reisa menningarhús í Reykjavík fyrir rúmlega 30 milljarða og þannig má áfram telja.

Elliði Vignisson

Gunnlaugur Grettisson

Guðlaugur Friðþórsson

Páley Borgþórsdóttir

Páll Marvin Jónsson

Páll Scheving Ingvarsson

Sigurlaug Björg Böðvarsdóttir

Ályktunin var samþykkt með sjö samhljóða atkvæðum.

Liðir 1-3 voru samþykktir með sjö samhljóða atkvæðum.