"Stille øy" verkefnið komið á fullt skrið.

Samstarfsverkefni þriggja eyjasamfélaga.  Gestirnir komu sl. mánudag - eru nú að vinna að verkefninu úti í Bjarnarey.

Eins og menn muna etv. fóru héðan fyrir tveim árum 6 ungmenni á vegum Leikfélags Vestmannaeyja og Framhaldsskólans í Vestmannaeyjum til Andøya til að taka þátt í leiklistarverkefni.  Vestmannaeyjabær kom að þessu verkefni og hafði Andrés Sigurvinsson umsjón með því.   

Nú eru Norðmenn að endurgjalda okkur heimsóknina og hafa bæst í hópinn tveir frændur okkar frá Færeyjum, sem taka þátt í vinnunni sem nú stendur yfir.

Hópurinn kom hingað til Vestmannaeyja sl. mánudag og hafa haft aðsetur í Félagsheimilinu.  Ólafur Guðmundsson og Katrine Strøm hafa yfirumsjón með verkefninu hérna heima í samráði við fræðslu-og menningarsvið.  Verkefnið hefur verið styrkt af norræna menningarsjóðnum og menningarborgarsjóði.

Hópurinn byrjaði hérna á Heimaey vinnuna.  Þau dveljast núna út í Bjarnarey þar sem þau eru að vinna að því að hrissta hópinn enn betur saman, skoða sögur og sagnir við sjávarsíðuna og vinna út atriði sem verða síðan uppistaðan í sýningu sem hópurinn mun vera með í lokin.  Áætlað er að sýningin verði haldin í Vélarsal Listaskólans.

Þetta er samnorrænt verkefni og eru þetta 22 einstaklingar sem taka þátt frá Vestmannaeyjum, Götu í Færeyjum og Andareyjum í Noregi.

Fræslu- og menningarsvið þakkar öllum þeim fjölmörgu sem hafa stutt við bakið á þessu verkefni og ekki síst þeim Bjarnareyingum fyrir gestrisnina.

Fræðslu-og menningarsvið