Skólastjórnendur grunnskólanna í námi

Einstaklingsmiðað nám, starfshættir sem koma til móts við einstaklinginn, getu hans og þarfir.

Stjórnendur grunnskólanna í Vestmannaeyjum eru þátttakendur í námskeiði sem mun standa fram á næsta ár og fjallar um einstaklingsmiðað nám.  Námskeiðið  er hugsað sem stuðningur við stjórnendur sem vilja þróa slíka starfshætti í skólum sínum. 

Kennarar grunnskólanna  hafa nú þegar kynnst  hugmyndum um einstaklingsmiðað nám  en  s.l. vor og  haust  tóku flestir þeirra þátt í námskeiðum sem haldin voru  á vegum  fræðsluskrifstofunnar um þetta efni. 

Þegar fjallað er um einstaklingsmiðað nám er  verið að tala  um ólíkar leiðir  í kennslu  þar sem  reynt er að koma til móts við  einstaklinginn og þarfir hans.  Kennarar  leitast við að aðlaga námsmarkmið, kennsluaðferðir, námsefni og námsgögn ásamt skipulagi og aðferðum að mismunandi getu og þörfum einstaklinga í námshópi.  Þó að áhersla sé  á að  nemendahópur eða bekkur eigi samleið sem bekkjarheild er leitast við að skipuleggja nám og kennslu þannig að hver nemandi njóti sín í skólanum og nái þeim hámarksárangri sem hann hefur forsendur til að ná. Í framhaldi af  þessu má búast við að sumir foreldrar hafið orðið og verði varir  við að kennsluhættir breytist eitthvað á næstu misserum eða árum, en svo virðist sem að í flestum skólum landsins séu starfsmenn að kynna sér  og þróa starfshætti sem miða að einstaklingsmiðuðu námi.

Fræðslu-og menningarsvið Vestmannaeyja

Erna Jóhannesdóttir, fræðslufulltrúi.