Sinfóníuhljómsveit Íslands heldur tónleika í Vestmannaeyjum 19. mars

- "einhver besti píanóleikari sem hér hefur komið fram?
Sinfóníuhljómsveit Íslands heldur í hljómleikaferð um næstu helgi og heimsækir Vestmannaeyjar.

Fyrirhugaðir eru tónleikar í Höllinni í Vestmannaeyjum laugardaginn 19. mars og hefjast þeir klukkan 17.00. Miðasala fer einnig fram í Höllinni og hefst tveimur stundum fyrir tónleikana eða klukkan 15.00. Miðaverði er stillt í hóf, aðeins 2000 krónur, börn yngri en 12 ára og námsmenn sem framvísa námsmannaskírteinum fá miðana á 1000 krónur. Eldri borgarar og öryrkjar fá 10% afslátt.

Á tónleikunum leikur lettneski píanóleikarinn Liene Circene en hún  vakti gríðarlega athygli fyrir frammistöðu sína á tónleikum í Salnum í Kópavogi. Jónas Sen gagnrýnandi Morgunblaðsins sagði að leikur hennar hefði verið "einhver mesta listræna opinberun á íslensku tónleikasviði í háa herrans tíð.? Hann staðhæfði að hún væri "einhver besti píanóleikari sem hér hefur komið fram? og lauk dómi sínum í þeirri von að hann fengi að heyra hana sem einleikara með Sinfóníuhljómsveit Íslands. Nú verður honum að ósk sinni. Hljómsveitarstjóri verður enginn annar en aðalhljómsveitarstjóri SÍ, Rumon Gamba.

Hljómsveitarstjóri: Rumon Gamba
Einleikari: Liene Circene

Engelbert Humperdinck: Forleikurinn að óperunni Hans og Gréta
Anatoly Liadov: Töfravatnið
Franz Liszt: Dauðadans fyrir píanó og hljómsveit
Richard Wagner: Skógarþytur úr óperunni Siegfried
Oddgeir Kristjánsson: Lagasyrpa (úts. Magnús Ingimarsson)
Pjotr Tsjajkovskíj: 1. 3. og 5. þáttur úr ballettsvítunni Þyrnirós