Eló bæjarlistamaður 2025
Tilkynnt var um bæjarlistamann Vestmannaeyja í Eldheimum í dag.
Það var Njáll Ragnarsson formaður bæjarráðs sem kynnti valið og skólalúðrasveit Vestmannaeyja lék nokkur létt og skemmtileg lög.
Eló - Elíasabet Guðnadóttir er bæjarlistamaður Vestmannaeyja 2025!
Elísabet Guðnadóttir fæddist í Vestmannaeyjum árið 1999 og ólst þar upp umvafin tónlistarlífi fjölskyldu sinnar. Hún lærði á hljóðfæri í tónlistarskólanum og var í skólalúðrasveitinni.
Elísabet hefur komið víða við til að sækja sér innblástur í tónlistinni, fór meðal annars í skóla í Sydney í Ástralíu þar sem áhugi hennar á lagasmíði og pródúseringu fæddist. Þaðan fór hún svo til Reykjavíkur og stundaði söngnám í tónlistarskóla FÍH.
Vorið 2024 steig Elísabet, Eló, hressilega út fyrir þægindarammann og tók þátt í Músíktilraunum þar sem hún hlaut annað sæti, ásamt því að hljóta verðlaun frá félagi tónskálda og textahöfunda fyrir framúrskarandi lagasmíði. Síðan þá hefur Eló spilað fyrir fjölda manns á stórum og litlum tónleikum á ýmsum sviðum, á Hljómey, á stóra sviðinu á Þjóðhátíð, í Háskólabíó þar sem hún hitaði upp fyrir Ásgeir Trausta, á Airwaves, í Hörpu á eyjatónleikum í Eldborg og í Upprásinni í Kaldalóni, í Færeyjum, og á árshátíðum, í veislum, jólatónleikum og við ýmis önnur tilefni.
Elísabet hefur ásamt stærri hópi haldið úti jólatónleika í Hvítasunnukirkjunni í Vestmannaeyjum, Jólahvísl, sem hefur verið ómissandi hluti af aðventu Eyjamanna frá árinu 2016.
Eló hefur gefið út þrjú lög sem er hægt að hlusta á á öllum streymisveitum. Hún er núna að vinna í breiðskífu sem hún hlakkar mikið til að deila með hlustendum sínum.
Hún er vel að þessu komin þessi frábæra tónlistarkona.
Til hamingju kæra Elísabet
