Bessahraun í deiliskipulag

Nokkrar umræður hafa verið um leyfi til byggingar íbúðarhúss í Bessahrauni.   Tilgangur þessarar greinar er útskýra hvað er deiliskipulag, stuðst er við gögn frá Skipulagsstofnun.

Um deiliskipulag
Byggingaframkvæmdir eru bundnar í skipulagi, með því að ákveðin möguleg byggingaráform eru afmörkuð með deiliskipulagsuppdrætti, þ.e. hvað má gera á ákveðnu svæði.   Deiliskipulagsuppdrættir eru samþykktir af bæjaryfirvöldum og öðrum lögboðnum skipulagsyfirvöldum. Þeir eru einnig kynntir almenningi með auglýsingu.   Hlutverk deiliskipulags er að útfæra nánar stefnu og ákvæði aðalskipulags. Í því er m.a. kveðið á um lóðastærðir, byggingarreiti, byggingarmagn, húsagerðir, umferðarkerfi, útivistarsvæði og fjölda bílastæða.

Vinna hafin
Vinna við gerð deiliskipulagsins er þegar hafin og gengur vel. Áætlað er að þeirri vinnu muni ljúka síðar í þessum mánuði.  Þá fer tillagan að deiliskipulaginu fyrir bæjarstjórn sem mun taka ákvörðun um hvort auglýsa megi skipulagstillöguna.  Þá verður hún  auglýst í Lögbirtingablaðinu og hún höfð til sýnis í 4 vikur.   Þeir sem telja sig eiga hagsmuna að gæta, geta gert athugasemdir við tillöguna og hafa til þess 6 vikur frá því að tillagan fer í auglýsingu.
Skipulagsnefnd Vestmannaeyja fjallar um athugasemdirnar sem berast og gerir tillögu til bæjarstjórnar um afgreiðslu.  Bæjarstjórn fjallar svo um tillöguna og tekur afstöðu til þeirra og hvort gera þurfi breytingar á henni.  Ef bæjarstjórn gerir verulegar breytingar skal hún auglýst á ný. 

Bæjarstjórn mun svo senda þeim sem gerðu athugasemdir umsögn sína, og auk þess kynna niðurstöðu sína opinberlega, m.a. á vef Vestmannaeyjabæjar.  Bæjarstjórn sendir svo samþykkt deiliskipulag til Skipulagsstofnunar.   Ef Skipulagsstofnun telur að einhverjir form- eða efnisgallar séu við deiliskipulagið, skal stofnunin koma athugasemdum sínum á framfæri við bæjarstjórn innan tveggja vikna frá því henni berst það.  Ef stofnunin gerir ekki athugasemdir skal bæjarstjórn auglýsa samþykkt deiliskipulag í B-deild Stjórnartíðinda þegar frestur Skipulagsstofnunar er liðinn.  Deiliskipulagið mun þá taka gildi þegar samþykkt þess hefur verið birt þar.

Áætlaður tími
Ef áætlun stenst mun deiliskipulagsferlinu ljúka í maí n.k.

Frosti Gíslason
Framkvæmdastjóri Umhverfis- og framkvæmdasviðs Vestmannaeyjabæjar