Fjárhagsáætlun Vestmannaeyjabæjar 2025 samþykkt
Rekstrarafgangur 541. m.k
Bæjarstjórn Vestmannaeyja hefur samþykkt samhljóða fjárhagsáætlun fyrir árið 2025.
Bæjarstjórn Vestmannaeyja hefur samþykkt samhljóða fjárhagsáætlun fyrir árið 2025.
Tekjur eru varlega áætlaðar og ekki gert ráð fyrir að skatttekjur ársins 2025 verði hærri en raunskatttekjur þessa árs.
Rekstrartekjur eru áætlaðar 9.697 m.kr. og rekstrarútgjöld eru áætluð 9.240 m.kr. á árinu 2025. Sem fyrr eru fræðslu- og uppeldismál sá málaflokkur sem tekur mest til sín, en aukin áhersla hefur verið lögð á að efla þennan málaflokk undanfarin ár og svo verður áfram. Enn sem fyrr verður gætt aðhalds í rekstri sveitarfélagsins og hagrætt þar sem við verður komið. Skuldahlutfall samstæðunnar er áætlað 62,7% og skuldaviðmiðið 21,2% á næsta ári.
Gert er ráð fyrir 1084 m.kr. til framkvæmda á næsta ári. Stærstu framkvæmdir næsta árs eru nýir búningsklefar við íþróttahúsið, nýtt þil á Gjábakka og gervigras á Hásteinsvöll. Bæjarsjóður mun þar að auki áætla fjármuni í almannavarnarvatnslögn (NSL4).
Áhersla verður áfram á góða þjónustu og traustan rekstur.
Álögum stillt í hóf:
Álagningarprósenta útsvars verður óbreytt á næsta ári eða 14,91%.
Fasteignaskattur íbúðarhúsnæðis lækkar í 0,235%. Fasteignaskattur á fyrirtæki lækkar í 1,325%. Með þessari lækkun er verið að mæta hækkun á fasteignamati í Vestmannaeyjum. Um er að ræða lækkun álagningarprósentu fasteignaskatts á íbúðarhúsnæði í sjötta sinn á sjö árum og í fimmta sinn á atvinnuhúsnæði á sex árum.
Gjaldskrárhækkunum er stillt í hóf og tillit tekið til langtímakjarsamninga.
Fjárhagsstaða Vestmannaeyjabæjar er sterk. Skuldir eru litlar og langt undir viðmiðunarmörkum sveitarstjórnarlaga. Það eru í raun fá, ef nokkur, sveitarfélög sem geta státað af álíka góðri skuldastöðu.
Úr framsögu Írisar Róbertsdóttur bæjarstjóra á bæjarstjórnarfundi sem haldinn var 27. nóvember 2024:
“Hér liggur fyrir bæjarstjórn mjög metnaðarfull, en jafnframt ábyrg áætlun fyrir árið 2025, þar sem áherslan er á að tryggja okkar innviði og horfa til framtíðar fyrir okkar góða samfélag. Lykillinn er að saman fari traustur rekstur og góð þjónusta. “
Vestmannaeyjabær vill leitast við að veita sem besta þjónustu með þarfir bæjarbúa í huga en jafnframt að gæta aðhalds í rekstri eins og hingað til.
Nálgast má glærukynning bæjarstjóra frá síðari umræðu um fjárhagsáætlun 2025 hér fyrir neðan.
