Sigurhanna Friðþórsdóttir, safnstjóri Sagnheima þakkaði fyrir höfðinglega gjöf fyrir hönd Vestmannaeyjabæjar en í safninu eru 24 fuglar, margir þeirra eru einstakir þar sem um svokölluð afbrigði er að ræða.
Tryggvi Már Sæmundsson, sagði nokkur orð fyrir hönd Olla og fjölskyldu. Fram kom í máli hans að hann efaðist um að nokkur annar í heiminum hafi náð að veiða fleiri afbrigði af lunda. En alls eru þau sjö talsins.
Í safninu má m.a. finna lundadrottningu, lundaprins, kolapilta, langvíudrottningu og hvítan hrossagauk. Þá eru í safninu flækingar eins og krákubróðir og tregadúfa.
Olli og fjölskylda telja að safnið eigi best heima hjá Vestmannaeyjabæ og treysta því að þar verði það vel varðveitt.
Opið er í Sagnheimum í Safnahúsinu alla daga frá kl. 10:00-17:00.