23.04.2020 Fréttir

Sumardagurinn fyrsti á Hraunbúðum og á HSU í Vestmannaeyjum

Almenn hátíðarhöld í Vestmannaeyjabæ voru felld niður á sumardaginn fyrsta út af Covid 19 og samkomubanninu. Vestmannaeyjabær ákvað engu að síður að bjóða öldruðum einstaklingum á hjúkrunarheimilinu og á sjúkradeildinni upp á smá gleði og söng í tilefni þess að sumarið er komið og bjartari tíð er framundan. Var þetta gert í samstarfi við þá aðila sem komu fram og eru þeim færðar bestu þakkir fyrir.

Deildu

Þessi ör-útgáfa af sumardagsskemmtun fór fram fyrir utan glugga matsalar Hraunbúða, á pallinum við austurenda hússins og fyrir utan heilbrigðisstofnunina og var því þrítekin í ljósi aðstæðna.

Dagsskráin var á þá leið að bæjarstjóri ávarpaði fólk með óskum um gleðilegt sumar, séra Viðar Stefánsson flutti hugvekju og Stuðlarnir fluttu nokkur vel valin lög sem minna á sumarið. Félagar úr Skátafélaginu Faxa stóðu heiðursvörð um samkomuna.

Það var ekki annað að sjá og heyra en að íbúar á viðkomandi stöðum hafi fagnað dagsskránni.

Gleðilegt sumar

Til baka í yfirlit