Nemendur í 7. bekkjum GRV hafa, í vetur, æft upplestur undir stjórn kennara sinna, þeirra Jóhönnu Njálsdóttur, Önnu Ýrar Sveinsdóttur og Svanhvítar Friðþjófsdóttur. Tólf nemendur, sem lásu upp á lokahátíð GRV fimmtudaginn 18. febrúar, stóðu sig vel og voru kennurum sínum og foreldrum til mikils sóma. Þrír nemendur og einn varamaður voru valdir úr hópnum til að keppa á upplestrarhátíð við nemendur úr skólum á Suðurlandi. Þeir, sem völdust til að keppa fyrir hönd GRV á lokahátíðinni á Suðurlandi, eru Aðalheiður S. Magnúsdóttir, Arnar Gauti Egilsson, Hólmfríður Arna Steinsdóttir og varamaður er Díana Svava Birkisdóttir. Í hléi bauð Ingimar í Vöruvali upp á hlaðborð af ferskum ávöxtum og eru honum færðar sérstakar þakkir fyrir, en hann hefur stutt upplestrarkeppnina með þessu móti mörg undanfarin ár. Nemendum 7. bekkja, bæði lesurum og þeim sem á hlýddu, eru færðar þakkir fyrir gott hljóð og prúðmannlega framkomu. Dómarar fá þakkir fyrir þeirra mikilvæga hlutverk og Tónlistarskólinn fyrir greiðan aðgang að sal skólans. Jafnframt eru foreldrum, kennurum og stjórnendum GRV sendar hamingjuóskir með þennan frábæra hóp sem 7. bekkurinn er.
F.h. fjölskyldu- og fræðslusviðs Vestmannaeyja
Erna Jóhannesdóttir
fræðslufulltrúi