Í morgun, föstudaginn 28. febrúar fóru fram undanúrslit þar sem þrír nemendur og einn varamaður voru valin til að fara og taka þátt í lokahátíð Stóru upplestrarkeppninnar á Kirkjubæjarklaustri í næsta mánuði. Nemendur lásu kafla úr sögunni Benjamín dúfa eftir Friðrik Erlingsson. Því næst lásu allir ljóð eftir Þóru Jónsdóttur og loks lásu nemendur ljóð að eigin vali. Allir þátttakendurnir stóðu sig með mikilli prýði og voru dómarar ekki öfundsverðir af hlutverki sínu. Nemendurnir sem völdust til að keppa fyrir hönd GRV eru Brigitta Kristín Bjarnadóttir, Urður Eir Egilsdóttir, Úlfur Alexander Hansen og varamaður Hulda Helgadóttir. Í hléi bauð Vöruval upp á ferska ávexti og eru Ingimari í Vöruvali færðar miklar þakkir fyrir, en hann hefur stutt upplestrarkeppnina með þessu móti mörg undanfarin ár. Nemendum 7. bekkja, bæði lesurum og þeim sem á hlýddu, eru færðar þakkir fyrir gott hljóð og prúðmannlega framkomu. Dómarar fá þakkir fyrir þeirra mikilvæga hlutverk . Jafnframt eru foreldrum, kennurum og stjórnendum GRV sendar hamingjuóskir með þennan frábæra hóp sem 7. bekkurinn er.
F.h. fjölskyldu- og fræðslusviðs Vestmannaeyja
Erna Jóhannesdóttir
fræðslufulltrúi