Í morgun, fimmtudaginn 3. mars fóru fram undanúrslit þar sem þrír nemendur og einn varamaður voru valdir til að fara og taka þátt í lokahátíð stóru upplestrarkeppninnar á Hellu seinna í mánuðinum. Nemendur lásu kafla úr sögu eftir Ármann Kr. Einarsson. Því næst lásu allir ljóð úr ljóðasafni Þorsteins frá Hamri og loks lásu nemendur ljóð að eigin vali. Allir ellefu þátttakendurnir stóðu sig með mikilli prýði og voru dómarar ekki öfundsverðir af hlutverki sínu. Nemendurnir sem völdust til að keppa fyrir hönd GRV eru Ásgeir Elíasson, Berglind Sigmarsdóttir, Gígja Sunneva Bjarnadóttir og Logi Snædal Jónsson. Í hléi bauð verslunin Vöruval upp á ávaxtabakka og nemendur 7. bekkjar buðu upp á nýbakaðar múffur og eru þeim færðar bestu þakkir fyrir. Nemendum 7. bekkjar, bæði lesurum og þeim sem á hlýddu, eru færðar þakkir fyrir gott hljóð og prúðmannlega framkomu. Dómarar fá þakkir fyrir þeirra mikilvæga hlutverk . Jafnframt eru foreldrum, kennurum og stjórnendum GRV sendar hamingjuóskir með þennan frábæra hóp sem 7. bekkurinn er.
f.h. fjölskyldu- og fræðslusviðs Vestmannaeyja
Erna Jóhannesdóttir
fræðslufulltrúi