Sýnum unga fólkinu áhuga. Komum og hlustum á upplestur nemenda í 7. bekkjum grunnskólanna. Nemendur úr Tónlistarskólanum spila nokkur lög.
Lokahátíð Stóru upplestrarkeppninnar í Vestmannaeyjum árið 2005 verður haldin í Félagsheimilinu við Heiðarveg mánudaginn 11. apríl klukkan 15:30. Að þessu sinni er lesið upp úr verkum Guðrúnar Helgadóttur og Jóhannesar úr Kötlum og einnig velja keppendur sér texta.
Nemendur 7. bekkja í grunnskólunum í Eyjum hafa unnið að undirbúningi lokahátíðarinnar frá því í haust. Þeir hafa æft upplestur undir stjórn kennara sinna og munu sex nemendur úr hvorum skóla taka þátt í lokahátíðinni. Þeir munu lesa upp úr verkum þekktra íslenskra höfunda, bæði bókmenntatexta og ljóð. Sérstök dómnefnd er skipuð og fer Baldur Sigurðsson frá Reykjavík, sem er yfirumsjónarmaður Stóru upplestrarkeppninnar fyrir henni.
Bæjarbúar eru eindregið hvattir til að fjölmenna á lokahátíðina, því hér er um að ræða ánægjulegan viðburð þar sem ungt fólk kemur fram og sýnir á sér sínar bestu hliðar í framkomu, upplestri og framsögn.
Fræðslu- og menningarsvið Vestmannaeyja.