Verkefnisstjóri boðar til stefnumótunarfunda á fimmtudaginn 10. nóvember og hefur fræðslu- og menningarsvið sent hlutaðeigendum tölvupósta þar sem fram koma tímasetningar og staðsetning fundanna. Viljum hvetja hlutaðeigendur að mæta nú vel á þessa fundi og leggja sín lóð á vogarskálarnar við undirbúning að mótun nýrrar skóla- og æskulýðsstefnu fyrir Vestmannaeyjabæ. Stefnumótunarfundum er ætlað að draga fram þau markmið sem stefna ber að til framtíðar í skóla- og æskulýðsmálum í Vestmannaeyjum. Fundir verða haldnir með kennurum leik-, grunn- og tónlistarskóla, fulltrúum nemenda, fulltrúum foreldra, forystumönnum íþrótta-, æskulýðs- og tómstundafélaga og fulltrúum úr stjórnkerfinu. Gert er ráð fyrir að hver fundur taki eina og hálfa klukkustund. Á fundunum verður sjónum einkum beint að eftirfarandi þáttum skóla- og æskulýðsmála:
- Heilbrigði og líðan
- Nám og kennsla
- Samskipti
- Forysta og lýðræðisleg þátttaka
- Ræktun mannauðs
- Náms- og starfsumhverfi
Fundarmenn fá það hlutverk að ræða sín á milli þau markmið sem þeim finnst mikilvægt að unnið sé að og hvaða leiðir fara má til að ná þeim. Fundarmönnum verður skipt í umræðuhópa og fær hver hópur eitt af ofangreindum viðfangsefnum til umfjöllunar. Gert er ráð fyrir að hver hópur skili tillögum frá sér í lok fundar. Þær tillögur verða nýttar við endanlega gerð skóla- og æskulýðsstefnu Vestmannaeyjabæjar.
Fh. verkefnisstjórnar, Trausti Þorsteinsson, verkefnisstjóri.
Andrés Sigurvinsson, framkvæmdastjóri fræðslu- og menningarsviðs Vestmannaeyjabæjar.