Rífandi gangur í Landeyjahöfn

Eins og frá hefur verið sagt náðist á laugardag sá áfangi í gerð Landeyjahafnar í Bakkafjöru, að fyrsta grjóthlassinu í fyrirhuguðum brimvarnargörðum var komið fyrir í fjöruborðinu. Garðarnir tveir verða fullgerðir um 700 metrar á lengd og hafa þann tilgang að verja höfnina og ferjubryggjuna gegn ágangi sjávar. Efnismagnið sem þarf í svo öflug mannvirki verður alls um 1,3 milljón tonn af grjóti en heildarmagnið í verkinu verður um 2 milljón tonn. Efnistaka hófst sl. haust úr nánum, en búið er að safna 1,5 milljónum tonna af grjóti á Markarfljótsaura fyrir ofan Hringveginn.