Menntamálaráðuneytið, Samtök sunnlenskra sveitarfélaga, Héraðssambandið Skarphéðinn, og Æskulýðsráð ríkisins efna til málþings, föstudaginn 4. nóvember 2005 um mikilvægi íþrótta-, félags- og tómstundastarfs fyrir ungt fólk undir yfirskriftinni: " Þátttaka er lífsstíll - Ungt fólk á Suðurlandi".
Málþingið verður haldið í sal Fjölbrautaskóla Suðurlands á Selfossi föstudaginn 4. nóvember nk. og stendur frá kl. 13:15-16:30.
Meðal fyrirlesara á málþinginu eru Einar Bárðarson, athafnamaður frá Selfossi, Þorvarður Hjaltason framkvæmdastjóri SASS og Sædís Íva Elíasdóttir formaður Ungmennasambands Vestur Skaftafellssýslu.
Dagskrá málþingsins skiptist í megindráttum í tvennt, framsögur og umræður í þremur umræðuhópum og ungmennasmiðju sem munu í lok dagsins kynna niðurstöður sínar. Afar mikilvægt er að sjónarmið leiðandi aðila í starfi ungs fólks komi fram í umræðunni sem og ekki síður raddir ungmennanna sjálfra.
Til málþingsins eru sérstaklega boðaðar bæjar- og sveitarstjórnir; bæjar- og sveitarstjórar; íþrótta-, æskulýðs- og tómstundanefndir og - ráð sveitarfélaga; starfsmenn sveitarfélaga, sem vinna að íþrótta- og tómstundamálum fyrir ungt fólk og samtök ungs fólks í sveitarfélögum.
Enn fremur er félögum og félagasamtökum, sem vinna að íþrótta- og félagsmálum fyrir ungt fólk á Suðurlandi, sérstaklega boðið að taka þátt í málþinginu.
Þá er ungt fólk á Suðurlandi sérstaklega hvatt til þess að taka þátt í málþinginu.
Dagskrá málþingsins má sjá hér á heimasíðunni undir liðnum viðburðir.
Sérstök athygli er vakin á því að þess er óskað að þátttaka tilkynnist fyrir miðvikudaginn 2. nóvember nk. með því að senda tölvupóst á póstfangið hsk@hsk.is. Nánari upplýsingar um málþingið er hægt að nálgast á skrifstofu HSK í síma 482-1189.
Ekkert þátttökugjald er á málþingið.
Af vef Héraðsambandis Skarphéðins
Fræðslu- og menningasvið Vestmannaeyja.