Kjörnir sveitarstjórnarmenn í landinu eru alls 628, þar af 429 karlar, eða 68%, og 199 konur, eða 32%. Oddvitar í sveitarstjórnum eru 98, þar af eru karlar 73 og konur 25. Konur eru í meirihluta sveitarstjórnarmanna í tíu sveitarfélögum á landinu en í sjö sveitarfélögum er engin kona meðal sveitarstjórnarmanna.
Til að vekja athygli á hlut kvenna í sveitarstjórnum hefur verið sett sérstakt kort á kosningavef félagsmálaráðuneytisins sem sýnir kynjahlutföll í sveitarstjórnum. Sveitarfélög með jafna kynjaskiptingu eru lituð græn, en þau sem eru með ójafna kynjaskiptingu eru rauð. Sveitarfélögin sem eru gul sýna hvar hallar á annað kynið á bilinu 30-39%
Stærð sveitarfélaga og landfræðileg lega þeirra virðist hafa áhrif kynjahlutföll í sveitarstjórnum.
- Í sveitarfélögum með fleiri en 1.000 íbúa eru konur um 35% fulltrúa í sveitarstjórnum.
- Í sveitarfélögum með færri en 500 íbúa eru konur aftur á móti um 29% kjörinna fulltrúa.
- Hlutfall kvenna í sveitarstjórnum er hæst á höfuðborgarsvæðinu þar sem konur eru 43% kjörinna fulltrúa.
Hlutfall kvenna í sveitarstjórnum á Íslandi hefur aukist hægt og bítandi síðastliðna hálfa öld og eftir síðustu sveitarstjórnarkosningar voru konur tæpur þriðjungur sveitarstjórnarmanna. Á sama tíma hefur sveitarfélögum í landinu fækkað verulega og þau stækkað.
Unnið er að því að safna upplýsingum um kynjahlutföll í nefndum og ráðum sveitarfélaga sem verða birtar á vefnum. Stefnt er að samanburði á kynjahlutföllum í sveitarstjórnum, nefndum og ráðum í kjölfar sveitarstjórnarkosninganna í vor.
Sjá nánar http://www.kosningar.is/jafnrettismal/jafnrettiskort
Tengt efni:
Stutt greining á kynjahlutföllum í sveitarfélögum (PDF, 30 Kb)