Núverandi dráttarbátur, Lóðsinn, er frá árinu 1998 og hefur 27 tonna dráttargetu. Skip sem koma til hafnarinnar hafa stækkað verulega og er nú talin þörf á dráttarbáti með 50–60 tonna dráttargetu. Til skoðunar hefur verið nýr dráttarbátur af gerðinni Damen ASD 2111.
Ráðið harmar að innviðaráðuneytið hafi ekki orðið við beiðni um fjármögnun í gegnum Hafnabótasjóð en fagnar því að málið verði skoðað við endurskoðun samgönguáætlunar. Ráðuneytið hefur jafnframt heitið samtali við dómsmálaráðuneytið og Landhelgisgæsluna um öryggis- og björgunarhlutverk bátsins.
Ráðið leggur áherslu á að öflugur dráttarbátur sé ekki aðeins nauðsynlegur fyrir starfsemi hafnarinnar heldur einnig mikilvægt öryggistæki við suðurströnd landsins. Bæði Landhelgisgæslan og Vegagerðin hafa undirstrikað mikilvægi slíks báts fyrir viðbragðs- og björgunargetu á svæðinu. Vestmannaeyjahöfn er eina höfnin milli Þorlákshafnar og Hornafjarðar sem getur hýst slíkan bát.
Ráðið telur endurnýjun dráttarbátsins brýnt öryggis- og innviðamál og mun áfram leggja áherslu á aðkomu ríkisins að fjármögnun verkefnisins.