Bæjarstjórn Vestmannaeyja - 1553. fundur

1.

Fjárhagsáætlun 2020 - 201909065

- SEINNI UMRÆÐA -

Niðurstaða

Íris Róbertsdóttir gerði grein fyrir þeim breytingum sem orðið hafa á fjárhagsáætlun Vestmannaeyjabæjar 2020 frá fyrri umræðu. Við umræðu um málið tóku einnig til máls: Helga Kristín Kolbeins, Trausti Hjaltason, Hildur Sólveig Sigurðardóttir, Elís Jónsson, Jóna Sigríður Guðmundsdóttir.

Bókun
Bæjarsjóður Vestmannaeyja stendur traustum fótum, hvort heldur litið er til reksturs, eigna eða skulda. Við rekstur sveitarfélagsins á næsta ári verður áhersla lögð á ábyrg fjármál og hagkvæman rekstur, en ekki síður að veita góða þjónustu. Jafnframt er þess gætt að sýna hófsemi í álagningu skatta og opinberra gjalda. Eins og fram kom í erindi bæjarstjóra við fyrri umræðu um fjárhagsáætlun 2020, var ákveðið að hlutfall fasteignaskatts á íbúðarhúsnæði yrði lækkað úr 0,33% í 0,291% og á atvinnuhúsnæði úr 1,65% í 1,55%. Þetta er gert til að mæta þeim hækkunum sem orðið hafa á fasteignamati milli 2019 og 2020 þannig að álögur á íbúaeigendur og eigendur fyrirtækja hækki ekki á milli ára. Þá var ákveðið að gjaldskrár fyrir þjónustu Vestmannaeyja (þ.e. aðalsjóðs) hækki ekki milli ára, þ.m.t. leikskólagjöld, gjaldskrá Íþróttamiðstöðvar og sundlaugar, matarskostnaður fyrir börn í grunn- og leikskólum, dagvistargjöld og úttektargjöld. Þessar ákvarðanir eru í anda lífskjarasamnings verkalýðshreyfingarinnar, atvinnurekenda og stjórnvalda þar sem m.a. er kveðið á um lægri skatta og lægri opinberar álögur til að auka kaupmátt og kjarabætur lágtekjuhópa.

Í fjárhagsáætlun er sömuleiðis gripið til margháttaðra aðgerða til að bæta þjónustu við unga jafnt sem aldna í sveitarfélaginu. Má þar nefna hækkun á frístundastyrk í 35.000 kr.; aukið fjármagn í stoðþjónustu leik- og grunnskóla; áherslu á snemmtæka íhlutun og tölvu og upplýsingamál; heilsueflingu eldri borgara og átak í aðgengismálum; Allt þetta miðar að því að bæta lífsgæði og auka ánægju íbúa í Vestmannaeyjum og að nýta tekjur sveitarfélagsins á ábyrgan og skilvirkan hátt til þjónustu við bæjarbúa.
Íris Róbertsdóttir (sign)
Elís Jónsson (sign)
Jóna Sigríður Guðmundsdóttir (sign)
Helga Jóhanna Harðardóttir) (sign)

Bókun
Bæjarfulltrúar Sjálfstæðisflokksins samþykkja framlagða fjárhagsáætlun og lýsa yfir ánægju m.a. með að komið hafi verið í veg fyrir verulega hækkandi fasteignagjöld á einstaklinga vegna hækkunar fasteignamats og dregið úr hækkandi fasteignagjöldum á atvinnustarfsemi ásamt því að tekin hefur verið ákvörðun um að ráðast í viðbyggingu við Hamarskóla sem mun sameina undir eitt þak starfsemi hans, frístundaversins og Tónlistarskólans og þannig auka rekstrarhagræðingu og bæta þjónustu við börn og fjölskyldur þeirra. Hins vegar gera bæjarfulltrúar Sjálfstæðisflokksins athugasemdir við eftirfarandi þætti:

1) Í niðurstöðu fjárhagsáætlunar ársins 2020 gefur að líta minnsta rekstrarafgang A hluta sveitarsjóðs til fjölda ára eða allt frá því áður en Sjálfstæðisflokkurinn tók við rekstri sveitarfélagsins. Lítill rekstrarafgangur af sveitarsjóði skýrist fyrst og fremst af verulegri þenslu í rekstri án nokkurrar hagræðingar eða aðgerða til að sporna við vaxandi útgjöldum á borð við nýjum stöðugildum og fjölda kostnaðarsamra úttekta, svo dæmi séu tekin.
2) Tekjur sveitarfélagsins duga ekki fyrir gjöldum þess í A hluta og ef ekki væri fyrir fjármagnstekjur sveitarfélagsins sem er ávöxtur öflugrar fjármálastjórnunar sveitarfélagsins í stjórnartíð Sjálfstæðisflokksins í Vestmannaeyjum yrði niðurstaða fjárhagsáætlunar neikvæð. Þannig er forsenda þjónustuaukningar byggð á þeim sjóðum sem Sjálfstæðisflokkurinn hefur eytt mikilli vinnu í að byggja upp. Það er mun auðveldara að eyða fé en að afla þess.
3) Gengið er á handbært fé sveitarfélagsins um 130 milljónir króna til að halda uppi framkvæmdahraða í sveitarfélaginu.
Hildur Sólveig Sigurðardóttir (sign)
Trausti Hjaltason (sign)
Helga Kristín Kolbeins (sign)

Bókun
Bæjarfulltrúar E- og H- lista sjá sig knúna til þess að bregðast við bókun bæjarfulltrúa Sjálfstæðisflokksins.

Fyrir fyrri umræður fjárhagsáætlunar var bæjarstjórn með vinnufund þar sem allar stórframkvæmdir sveitarfélagsins voru ákveðnar. Tekin var meðvituð ákvörðun um að ganga á handbært fé sveitarfélagsins vegna þess að ekki hefur tekist að framkvæma það sem átti að framkvæma á árunum 2018 og 2019. Allir bæjarfulltrúar voru sammála um þessa nálgun.

Tekjur A-hluta duga fyrir gjöldum, framlög til A og B hluta fyrirtækja upp á 192 milljónir eru inni í rekstri A hluta sem gera það að verkum að rekstrarniðurstaðan er lægri. Rekstrarframlög hafa verið bókuð inn á A hluta frá árinu 2017, áður var B hlutinn rekinn með tapi og það lækkaði afkomu samstæðunnar. Því er rangt sem kemur fram í bókun hjá bæjarfulltrúum Sjálfstæðisflokksins að áætlun hafi aldrei verið lögð fram með minni afgangi. Fram til ársins 2017 var fjárhagsáætlun öðruvísi uppsett, þá voru ákveðin B hluta fyrirtæki sveitarfélagsins látin skila tapi í fjárhagsáætlun en í dag fá þau rekstrarframlög frá A hluta.
Jóna Sigríður Guðmundsdóttir (sign)
Íris Róbertsdóttir (sign)
Elís Jónsson (sign)
Helga Jóhanna Harðardóttir (sign)

Elís Jónsson forseti bæjarstjórnar bar upp lykiltölur í fjárhagsáætlun ársins 2020:

Fjárhagsáætlun Sveitarsjóðs Vestmannaeyja 2020:
Tekjur alls 4.129.936.000
Gjöld alls fyrir fjármagnsliði 4.214.648.000
Rekstrarniðurstaða,jákvæð 43.797.000
Veltufé frá rekstri 500.509.000
Afborganir langtímalána 22.540.000
Handbært fé í árslok 568.720.000


Fjárhagsáætlun B-hluta bæjarsjóðs Vestmannaeyja 2020:
Rekstrarniðurstaða Hafnarsjóðs, hagnaður 83.320.000
Rekstrarniðurstaða Fráveitu, hagnaður 32.182.000
Rekstrarniðurstaða Félagslegra íbúða, hagnaður 0
Rekstrarniðurstaða Vatnsveitu 0
Rekstrarniðurstaða Hraunbúðir 0
Rekstrarniðurstaða Náttúrustofu Suðurlands,hagn. 5.372.000
Rekstrarniðurstaða Herjólfs ohf. tap -11.831.000
Veltufé frá rekstri 233.159.000
Afborganir langtímalána 13.089.000


Fjárhagsáætlun samstæðu Vestmannaeyja 2020:
Tekjur alls 6.618.967.000
Gjöld alls 6.591.472.000
Rekstrarniðurstaða, jákvæð 152.840.000
Veltufé frá rekstri 733.668.000
Afborganir langtímalána 35.629.000
Handbært fé í árslok 568.720.000

Fjárhagsáætlun 2020 var samþykkt með sjö samhljóða atkvæðum.

2.

Þriggja ára fjárhagsáætlun 2021-2023 - 201910135

- SEINNI UMRÆÐA -

Niðurstaða

Íris Róbertsdóttir greindi frá þriggja ára fjárhagsáætlun 2021 til 2023.

Þriggja ára fjárhagsáætlun Vestmannaeyjabæjar fyrir árin 2021 - 2023 var samþykkt með sjö samhljóða atkvæðum. Helga Kristín Kolbeins gerði grein fyrir atkvæði sínu.

3.

Breyting á varabæjarfulltrúa - 201811023

Lagt er til við yfirkjörstjórn að Kristín Hartmannsdóttir, Bröttugötu 2 verði skipuð varabæjarfulltrúi í bæjarstjórn Vestmannaeyja fyrir H-lista í stað Guðmundar Þórðar Ásgeirssonar sem flutt hefur lögheimili úr sveitarfélaginu skv. 22. grein bæjarmálasamþykkt.

Niðurstaða

Samþykkt með sjö samhljóða atkvæðum.

4.

Kosning í ráð, nefndir og stjórnir skv. 44.gr samþykktar um stjórn Vestmannaeyjabæjar og fundarsköp bæjarstjórnar - 201906110

Niðurstaða

Sigurhanna Friðþórsdóttir skipuð aðalmaður í Heilbrigðisnefnd Suðurlands í stað Styrmis Sigurðarsonar.

Samþykkt með sjö samhljóða atkvæðum.

Ákveðið var að fresta umræðu um skipun fulltrúa í byggingarnefnd um Hamarskóla til næsta bæjarstjórnarfundar.

Samþykkt með sjö samhljóða atkvæðum.

5.

Framkvæmda- og hafnarráð Vestmannaeyja - 241 - 201910012F

Liðir 1-5 liggja fyrir til staðfestingar.

Niðurstaða

Liðir 1-5 voru samþykktir með sjö samhljóða atkvæðum.

Samþykkt með sjö samhljóða atkvæðum.

6.

Fjölskyldu- og tómstundaráð - 237 - 201911002F

Liður 3, Málefni fatlaðs fólks liggur fyrir til umræðu og staðfestingar.
Liðir 1-2 og 4-6 liggja fyrir til staðfestingar.

Niðurstaða

Við umræðu um lið 3, Málefni fatlaðs fólks tóku til máls: Helga Jóhanna Harðardóttir, Helga Kristín Kolbeins og Hildur Sólveig Sigurðardóttir.

Bókun
Meirihluti E- og H- lista telur mikilvægt að hugað sé að aðgengi fyrir alla í Vestmannaeyjabæ. Með það að leiðarljósi hefur verið hrint af stað átaki þar sem farið verður yfir götukanta og gangbrautir í miðbænum. Meirihlutinn vill hvetja fólk til þess að koma með ábendingar um það sem betur má fara hjá bæjarfélaginu í aðgengismálum. Aðgengi að tímabundnu húsnæði bæjarskrifstofanna er ekki til fyrirmyndar og unnið er að því að koma skrifstofunum á nýjan stað með betra aðgengi. Meirihlutinn tekur undir með Fjölskyldu- og tómstundaráði þegar ráðið hvetur fyrirtæki í bænum til þess að skoða aðgengi hjá sér og bæta ef þess þarf.
Helga Jóhanna Harðardóttir (sign)
Íris Róbertsdóttir (sign)
Jóna Sigríður Guðmundsdóttir (sign)
Elís Jónsson (sign)

Bókun
Bæjarfulltrúar Sjálfstæðisflokksins taka undir mikilvægi þess að bæta aðgengi fyrir fatlaða. Nauðsynlegt er að horfa til þess í öllum framkvæmdum á vegum sveitarfélagsins
Hildur Sólveig Sigurðardóttir (sign)
Trausti Hjaltason (sign)
Helga Kristín Kolbeins (sign)

Liður 3, Málefni fatlaðs fólks var samþykktur með sjö samhljóða atkvæðum

Liðir 1-2 og 4-6 voru samþykktir með sjö samhljóða atkvæðum.

7.

Bæjarráð Vestmannaeyja - 3112 - 201911004F

Liðir 1 - 9 liggja fyrir til staðfestingar.

Niðurstaða

Liðir 1-9 voru samþykktir með sjö samhljóða atkvæðum.

8.

Fræðsluráð - 323 - 201911003F

Liður 9,Umhverfis Suðurland liggur fyrir til umræðu og staðfestingar.
Liðir 1-8 liggja fyrir til staðfestingar.

Niðurstaða

Við umræðu um lið 9, Umhverfis Suðurland tók til máls: Helga Kristín Kolbeins

Liður 9, Umhverfis Suðurland var samþykktur með sjö samhljóma atkvæðum.

Liðir 1-8 voru samþykktir með sjö samhljóða atkvæðum.

9.

Bæjarráð Vestmannaeyja - 3113 - 201911007F

Liðir 1-7 liggja fyrir til staðfestingar.

Niðurstaða

Liðir 1-7 voru samþykktir með sjö samhljóða atkvæðum.

10.

Umhverfis- og skipulagsráð Vestmannaeyja - 315 - 201911006F

Liður 1, Deiliskipulag á athafnasvæði AT-1 við Græðisbraut liggur fyrir til umræðu og staðfestingar.
Liður 2, Deiliskipulag á athafnasvæði AT-3 við Flugvöll liggur fyrir til umræðu og staðfestingar.
Liður 3, Deiliskipulag fyrir móttökustöð úrgangsefna I-1 liggur fyrir til umræðu og staðfestingar.
Liður 4, Heiðarvegur 14. Umsókn um byggingarleyfi -slökkvistöð- liggur fyrir til umræðu og staðfestingar.
Liður 6, Búhamar 37. Umsókn um byggingarleyfi liggur fyrir til umræðu og staðfestingar.
Liðir 5 og 7-15 liggja fyrir til staðfestingar.

Niðurstaða

Við umræðu um lið 1, Deiliskipulag á athafnasvæði AT-1 við Græðisbraut tóku til máls: Jóna Sigríður Guðmundsdóttir, Helga Kristín Kolbeins, Trausti Hjaltason og Hildur Sólveig Sigurðardóttir.

Bókun
Afgreiðsla þessa máls hjá meirihluta ráðsins vekur furðu bæjarfulltrúa Sjálfstæðisflokksins. Vestmannaeyjabæ hafa borist ítarlegar athugasemdir frá hagsmunaaðilum við upphaflega auglýst byggingarmagn. Með þessari ákvörðun er verið að samþykkja að vinna nýja tillögu sem mun fela í sér mun meira byggingarmagn og stækkun sem mun hafa áhrif á ásýnd miðbæjarjaðarins. Til samanburðar þá er hæð stóra sals íþróttamiðstöðvarinnar um 11m en umrædd bygging er áætlað að verði 9,5 m há.
Þessi framganga meirihluta ráðsins ber vitnisburð um að enn á ný sé lítil virðing borin fyrir fjármunum sveitarfélagsins en mikil vinna og kostnaður sem telur fleiri milljónir liggur á bak við það deiliskipulag sem nú er vísað frá og hefja á vinnu við að nýju.

Sú ákvörðun verður að telja líklegt að muni fela í sér enn harðari mótmæli og óánægju hagsmunaaðila sem nú þegar hafa sent inn athugasemdir vegna fyrra skipulags. Auk þess er um að ræða viðkvæmt svæði sem miklar deilur hafa staðið um og ólíklegt að ákvörðun sem þessi sé líkleg til lausnar þeirra. Mun eðlilegra er að úthluta því byggingarmagni sem verið er að óska eftir við nýtt iðnaðarsvæði sem búið er að samþykkja að rísi við flugvöllinn.
Hildur Sólveig Sigurðardóttir (sign)
Trausti Hjaltason (sign)
Helga Kristín Kolbeins (sign)

Bókun
Meirihluti E- og H- lista vill bregðast við óskum lóðarhafa enda um að ræða stækkun á byggingareit innan lóðarmarka lóðarhafa með því að setja málið í ferli.
Í framhaldinu verður farið í hefðbundið deiliskipulagsferli og felst það í því að auglýsa aftur.
Meirihluti E- og H-lista telur mikilvægt að Vestmannaeyjabær standi ekki í vegi fyrir eða hindri að fyrirtæki í Vestmannaeyjum geti stækkað og útvíkkað sína atvinnustarfsemi. Mikilvægt er að öll fyrirtæki geti dafnað vel í okkar samfélagi og hafi tök á því að stækka. Mikil þörf er á því að efla uppbyggingu í atvinnulífinu.
Jóna Sigríður Guðmundsóttir (sign)
Íris Róbertsdóttir (sign)
Elís Jónsson (sign)
Helga Jóhanna Harðardóttir (sign)

Liður 1, Deiliskipulag á athafnasvæði AT-1 við Græðisbraut var samþykktur með fjórum atkvæðum E og H lista gegn þremur atkvæðum D lista.

Við umræðu um lið 2, Deiliskipulag á athafnasvæði AT-3 við flugvöll tóku til máls: Hildur Sólveig Sigurðardóttir, Jóna Sigríður Guðmundsóttir, Trausti Hjaltason og Helga Kristín Kolbeins.

Bókun
Bæjarfulltrúar Sjálfstæðisflokksins fagna því að nýtt athafnasvæði sé í vinnslu líkt og aðalskipulag gerði ráð fyrir, enda mikilvægt að geta boðið upp á lóðir fyrir atvinnustarfsemi. Bæjarfulltrúar Sjálfstæðisflokksins telja ákjósanlegast fyrir ásýnd svæðisins í heild sinni að fyrst verði úthlutað lóðum austanmegin á svæðinu og þar af leiðandi er eðlilegt að það svæði verði deiliskipulagt sem fyrst til að tryggja samfellu í byggð.
Trausti Hjaltason (sign)
Hildur Sólveig Sigurðarsdóttir (sign)
Helga Kristín Kolbeins (sign)

Bókun
Meirihluti E- og H- lista telur sérstakt vinnulag af hálfu minnihlutans D-lista að koma með athugasemdir þegar búið er að vinna að verkinu í níu mánuði. Mikilvægt er að hafa í huga að á þessum rúmum níu mánuðum er mikil vinna að baki sem er dýrmæt og kostnaðarsöm.
Á fundi umhverfis- og skipulagsráðs þann 11. mars var skilningur starfsmanna um ferlið sá sami og fulltrúa meirihluta E- og H- lista og því hvernig unnið yrði áfram með málið þ.e. að áfangaskipta deiliskipulaginu og byrja vestan megin.
Á bæjarstjórnarfundi þann 28. mars samþykkti bæjarstjórn að senda skipulagslýsingu til umsagnar.
Hvorki komu athugasemdir frá minnihluta í umhverfis- og skipulagsráði né minnihluta í bæjarstjórn.
Nú leggur minnihlutinn til að farið verði í vinnu við deiliskipulag líka austan megin en ástæðan fyrir því að ákveðið var að áfangaskipta deiliskipulaginu var m.a. vegna mikils kostnaðar við að deiliskipuleggja allt svæðið í einu.
Jóna Sigríður Guðmundsdóttir (sign)
Íris Róbertsdóttir (sign)
Elís Jónsson (sign)
Helga Jóhanna Harðardóttir (sign)

Bókun
Fulltrúar Sjálfstæðisflokksins í ráðinu hafa komið á framfæri ábendingum með þeim áherslum sem um ræðir í tvígang á fundum ráðsins og ættu því þessar áherslur fulltrúa Sjálfstæðisflokksins ekki að koma meirihluta H- og E-lista á óvart.
Trausti Hjaltason (sign)
Hildur Sólveig Sigurðarsdóttir (sign)
Helga Kristín Kolbeins (sign)

Liður 2, Deiliskipulag á athafnasvæði AT-3 við flugvöll var samþykktur með sjö samhljóða atkvæðum.

Liður 3, Deiliskipulag fyrir móttökustöð úrgangsefna I-1 var samþykktur með sjö samhljóða atkvæðum

Við umræðu um lið 4, Heiðarvegur 14. Umsókn um byggingarleyfi - slökkvistöð- tóku til máls: Hildur Sólveig Sigurðardóttir, Helga Jóhanna Harðardóttir og Elís Jónsson.

Bókun
Fulltrúar Sjálfstæðisflokksins hafa ætíð talið það rétt skref að stöðin rísi á þeim stað sem henni hefur nú verið fundinn staður við Heiðarveg, eftir að meirihlutinn hafði áður ákveðið aðra staðsetningu við Malarvöllinn. Sátt um svona stórt og viðamikið heillaskref er mikilvægt og því vel hægt að gleðjast fyrir því framfaraskrefi sem tekið er hér varðandi híbýli Slökkviliðs Vestmannaeyja. Bæjarfulltrúar Sjálfstæðisflokksins fagna niðurstöðunni líkt og áður sem tryggir verulega bættan húsakost Slökkviliðsins á ásættanlegum framkvæmdatíma, samlegðaráhrif slökkvistöðvar og þjónustumiðstöðvar, rekstrarkostnaði er haldið í lágmarki ásamt því að lágmarksröskun verður á skipulagsreitum sveitarfélagsins.
Trausti Hjaltason (sign)
Hildur Sólveig Sigurðarsdóttir (sign)
Helga Kristín Kolbeins (sign)

Bókun
Meirihluti E- og H- lista fagnar því að hér sé verið að samþykkja byggingaleyfi fyrir slökkvistöð enda löngu tímabært að koma þessu ferli af stað.
Jóna Sigríður Guðmundsdóttir (sign)
Íris Róbertsdóttir (sign)
Elís Jónsson (sign)
Helga Jóhanna Harðardóttir (sign)

Liður 4, Heiðarvegur 14. Umsókn um byggingarleyfi - slökkvistöð- var samþykktur með sjö samhljóða atkvæðum.

Liður 6, Búhamar 37. Umsókn um byggingarleyfi var samþykktur með sjö samhljóða atkvæðum.

Liðir 5 og 7-15 voru samþykktir með sjö samhljóða atkvæðum.

11.

Fjölskyldu- og tómstundaráð - 238 - 201911011F

Liður 3, Framtíðarskipulag og uppbygging íþróttamála í Vestmannaeyjum liggur fyrir til umræðu og staðfestingar.
Liðir 1-2 liggja fyrir til staðfestingar.

Niðurstaða

Við umræðu um lið 3, Framtíðarskipulag og uppbygging íþróttamála í Vestmannaeyjum tóku til máls: Helga Kristín Kolbeins, Elís Jónsson, Hildur Sólveig Sigurðardóttir, Helga Jóhanna Harðardóttir og Íris Róbertsdóttir.

Bókun
Í ljósi þess að mikil vinna fulltrúa í þessum hóp hefur farið í að greina og kortleggja störf íþróttafélaga í Vestmannaeyjum, umfang þeirra og þarfir er nauðsynlegt að kjörnir fulltrúar fái einhver gögn í hendurnar. Því óska bæjarfulltrúar Sjálfstæðisflokksins eftir fundargerðum úr þessari vinnu enda er hún yfirgripsmikil og virðist eiga að liggja til grundvallar fjárútláta sveitarfélagsins án þess að það hafi verið skilgreint hlutverk hennar í upphafi samkvæmt skipan fjölskyldu- og tómstundaráðs. Ákjósanlegast hefði verið að vinna umrædds starfshóps hefði verið lokið fyrir vinnu við fjárhagsáætlun líkt og til stóð þar sem væri hægt að taka tillit til niðurstaðna hópsins.
Helga Kristín Kolbeins (sign)
Hildur Sólveig Sigurðardóttir (sign)
Trausti Hjaltason (sign)

Bókun
Meirihluti E- og H- lista lýsir yfir ánægju með þá vinnu sem hefur farið fram. Mikilvægt er að kortleggja uppsafnaða þörf en kröfur um bætta aðstöðu á aðildafélög ÍBV hérðassambands eru reglulega að aukast. Vísbendingar eru jafnframt um að rekstur sumra félaga sé þungur.
Meirihlutinn hefur væntingar um að niðurstöður íþr&oacu