Samkvæmt tillögunni lækkar álagningarprósenta fasteignaskatts á íbúðarhúsnæði, A-flokki, úr 0,225% í 0,220%. Álagningarprósenta á annað húsnæði, C-flokki, þar á meðal atvinnuhúsnæði, lækkar úr 1,315% í 1,300%. Álagning á opinberar stofnanir, B-flokk, verður óbreytt í 1,320%.
Undanfarnar vikur hefur verið unnið að því á bæjarskrifstofum Vestmannaeyja að meta áhrif breytinga á álagningarprósentum fasteignaskatts á tekjur bæjarsjóðs og er tillagan hluti af þeirri vinnu.
Breytt verklag við endurálagningu
Árlega fer fram endurálagning á alla flokka (A-B-C) í júní og er afsláttur af fasteignagjöldum einstaklinga þá endurreiknaður miðað við skattframtal ársins á undan. Breyting verður á þessu verklagi sem felst í því að álagningin verður endurreiknuð hjá öllum sem undir hana falla, en ekki eingöngu þeim sem óska sérstaklega eftir endurskoðun.
Tillagan verður tekin til afgreiðslu í bæjarstjórn.