Fara í efni

Fræðsluráð Vestmannaeyja

412. fundur
12. nóvember 2026 kl. 12:00 - 13:43
Í fundarsal Fjölskyldu- og fræðslusviðs við Kirkjuveg
Nefndarmenn
Aníta Jóhannsdóttir formaður
Þórdís Jóna Guðmundsdóttir varaformaður
Óskar Jósúason aðalmaður
Rannveig Ísfjörð aðalmaður
Sonja Andrésdóttir aðalmaður
Starfsmenn
Helga Sigrún Þórsdóttir starfsmaður
Jón Pétursson starfsmaður
Dagskrá
1.
Starfsáætlanir leik- og grunnskóla Vestmannaeyjabæjar.
Málsnúmer 201310060
Eyja Bryngeirsdóttir, leikskólastjóri Kirkjugerðis kynnti og lagði fram starfsáætlun leikskólans fyrir árið 2026 -2027.
Fræðsluráð þakkar kynninguna á starfsáætlun skólans fyrir skólaárið 2026-2027 og staðfestir áætlunina.
2.
Starfshópur um gjaldskrá leikskóla og vinnudag barna
Málsnúmer 202309120
Vegna breytinga á skipan fræðsluráðs er lagt til að Þórdís Jóna Guðmundsdóttir verði skipuð í starfshóp um gjaldskrá leikskóla og vinnudag barna í stað Eyrúnar Haraldsdóttur fyrir hönd E lista.
Fulltrúi Miðflokks í fræðsluráði óskar eftir kostnaðarmati á 36 stunda gjaldfrjálsri leikskólavist.
Fræðsluráð samþykkir skipun Þórdísar Jónu Guðmundsdóttur í starfshóp um gjaldskrá leikskóla og vinnudag barna í stað Eyrúnar Haraldsdóttur.

Fræðsluráð felur sviðsstjóra fjölskyldu- og fræðslusviðs að vinna kostnaðarmat vegna 36 gjaldfrjálsra leikskólastunda og vísar málinu til frekari umfjöllunar í starfshópi um gjaldskrá leikskóla og vinnudag barna.

Ráðið óskar eftir því að formaður starfshópsins boði til fundar við fyrsta tækifæri.

3.
Sumarlokun leikskólanna og sumarleyfi.
Málsnúmer 202103037
Skólaskrifstofa leggur til að sumarlokun leikskólanna sumarið 2027 verði frá 8. júlí til 10. ágúst. Leikskólar opna klukkan 10:00 þann 11. ágúst. Sumarlokun fyrir árið 2028 verði frá 12. júlí til 14. ágúst. Leikskólar opna klukkan 10:00 þann 15. ágúst.
Fulltrúi M listans leggur fram eftirfarandi tillögu; "Miðflokkurinn leggur til að sumarlokun leikskólana varir einungis í tvær vikur. Hvert barn skal hins vegar taka fjórar vikur í samfellt frí og skulu hinar tvær vikurnar tengdar öðru hvoru megin við lokun leikskóla. Markmiðið er að auka sveigjanleika fjölskyldna, auðvelda skipulag sumarleyfa á almennum vinnumarkaði og koma betur til móts við þarfir atvinnulífsins í Vestmannaeyjum. "

Fulltrúar sjálfstæðisflokksins leggja til að afgreiðslu tillögu Miðflokksins verði frestað fram á næsta fund ráðsins. Óskað er eftir formlegri umsögn leikskólastjórnenda, gögnum frá skólaskrifstofu um fyrri reynslu af sama fyrirkomulagi og lagt er til með og kostnaðarmati frá sviðsstjóra, þannig að ráðið geti tekið upplýsta ákvörðun um málið.

Samþykkt með fjórum atkvæðum fulltrúa D-lista og E-lista gegn einu atkvæði fulltrúa M-lista.

Fulltrúi M listans leggur frameftirfarandi bókun: „Fulltrúi Miðflokksins harmar að fulltrúar sjálfstæðisflokksins og fulltrúi Eyjalistans hafi hafnað því að taka tillögu Miðflokksins til afgreiðslu undir þessum dagskrárlið. Tillagan hefði tryggt börnum áfram fjögurra vikna samfellt sumarleyfi frá leikskóla en jafnframt veitt foreldrum aukinn sveigjanleika til að samræma sumarleyfi barna sinna við orlof og atvinnuþátttöku fjölskyldunnar. Núverandi fyrirkomulag getur reynst sérstaklega íþyngjandi fyrir foreldra á almennum vinnumarkaði, þar semmöguleikar til sveigjanlegrar orlofstöku eru oft takmarkaðir. Aukinn sveigjanleiki hefði ekki aðeins komið til móts við þarfir fjölskyldna heldur einnig auðveldað atvinnurekendum aðskipuleggja sumarleyfi starfsfólks og tryggja samfellda starfsemi yfir sumartímann. Miðflokkurinn leggur áherslu á að leikskólaþjónusta sveitarfélagsins eigi að taka mið af þörfum barna og fjölskyldna, styðja við atvinnuþátttöku foreldra og efla valfrelsi þeirra, fremur en að setja fjölskyldum óþarfa skorður við að samræma atvinnu og fjölskyldulíf. Vestmannaeyjabær á að vera fjölskylduvænt sveitarfélag í verki, ekki aðeins í orði. Það felur í sér að grunnþjónusta sveitarfélagsins sé skipulögð með hagsmuni barna að leiðarljósi, án þess að horft sé fram hjá ólíkum aðstæðum foreldra og þörfum atvinnulífsins. Miðflokkurinn telur miður að ekki hafi gefist tækifæri til að ræða og taka afstöðu til tillögu sem hefði getað stuðlað að sanngjarnra og sveigjanlegra fyrirkomulagi, börnum, fjölskyldum og atvinnulífi í Vestmannaeyjum til hagsbóta.“ (sign. Sonja Andrésdóttir)


Gerð var 10 mínútna fundarhlé.

Bókun D listans: "Bæði tillaga skólaskrifstofu og tillaga Miðflokksins lágu fyrir fundinum og voru til umræðu. Því er ekki rétt að ekki hafi gefist tækifæri til að ræða málið. Afgreiðslu tillögu Miðflokksins er frestað til næsta fundar ráðsins svo afla megi formlegrar umsagnar leikskólastjórnenda, upplýsinga um fyrri reynslu af sambærilegu fyrirkomulagi og kostnaðarmats. Breytingar á sumarlokun leikskóla þurfa að taka mið af rekstrarlegum áhrifum, mönnun, vinnudegi barna og gæðum leikskólastarfsins. Við skipulag þjónustunnar þarf að gæta jafnvægis milli þarfa barna, uppbyggingu starfseminnar og ábyrgs rekstrar. Því telja fulltrúar Sjálfstæðisflokksins nauðsynlegt að fyrir liggi faglegt og fjárhagslegt mat áður en ákvörðun er tekin um breytt fyrirkomulag. Ef umbeðin gögn sýna fram á að tilefni sé til endurskoðunar geta samþykktar dagsetningar sumarlokunar eftir árið 2027 tekið breytingum." (sign Aníta Jóhannsdóttir, Rannveig Ísfjörð og Óskar Jósúason)

Tillaga skólaskrifstofu um sumarlokun leikskóla fyrir árin 2027 og 2028 er samþykkt með fjórum atkvæðum fulltrúa D-lista og E-lista gegn einu atkvæði fulltrúa M-lista.

Bókun E listans: "Undirrituð er tilbúin til að samþykkja sumarlokun 2027 en finnst mikilvægt er að skoðað verði hvort hægt sé að auka fjölbreytni í sumarlokun leikskóla til að mæta fjölbreyttum hópi foreldra leikskólabarna fyrir árið 2028." (sign. Þórdís Jóna Guðmundsdóttir)

Bókun D listans: "Ljóst er að ekki verður unnt að gera breytingar á fyrirkomulagi sumarlokunar leikskóla fyrir árið 2027 þar sem undirbúningur og skipulag vegna þess árs er þegar hafið. Verði talin þörf á breytingum eða endurskoðun fyrirkomulagsins getur Fræðsluráð þó ávallt tekið ákvörðun um sumarlokun ársins 2028 til nýrrar umfjöllunar. Samþykkt til næstu tveggja ára er því fyrst og fremst liður í að auka fyrirsjáanleika í starfseminni." (sign Aníta Jóhannsdóttir, Rannveig Ísfjörð og Óskar Jósúason)
4.
Frístund
Málsnúmer 200706207
Frh. af máli 2 fræðsluráðsfundar nr. 411. Sviðsstjóri fjölskyldu- og fræðslusviðs kynnti drög að nýrri gjaldskrá og uppfærðar reglur frístundar. Þær breytingar sem lagðar eru til varðandi gjaldskrá frístundar er að í stað mánaðargjalds verði boðið upp á að greiða fyrir daga þar sem stiglækkun er á gjaldi því fleiri daga sem barn nýtir. Einnig er hægt að kaupa ákveðið fylgdargjald vegna íþróttaæfinga fyrir börn sem nýta frístund takmarkað en þurfa fylgd á æfingar. Áfram verður svo boðið upp á heildagsvistun á skráningardögum og bætist þá gjald við daginn sem og kostnaður vegna matar. Hækkun á gjaldi er innan 2,5% viðmiða sem bæjarstjórn hefur ákveðið. Sviðsstjóri og forstöðumaður frístundamiðstöðvar leggja einnig fram til kynningar drög að endurskoðuðum reglum fyrir frístund.
Ráðið samþykkir fyrir sitt leiti tillögur að breyttri gjaldskrá og mun taka afstöðu til breyttra reglna á næsta fundi ráðsins.
5.
Framtíðarsýn og áherslur í menntamálum.
Málsnúmer 201411027
Deildarstjóri fræðslu- og uppeldismála kynnti stöðuna við mótun nýrrar framtíðarsýnar. Rafrænni kosningu meðal kennara í leik- og grunnskólum um áherslur framtíðarsýnarinnar lauk á föstudaginn var og vinnur starfshópurinn nú úr þeim niðurstöðum. Næstu skref er að umræðuhópar innan leik- og grunnskólanna fari af stað á næstu dögum og verður niðurstöðum þeirrar vinnu skilað til starfshópsins sem fyrst. Af þeim sökum verður ekki unnt að fylgja upphaflegri tímaáætlun ráðsins. Áætlað er að fyrstu drög að nýrri framtíðarsýn verði lögð fram á næsta fundi fræðsluráðs.
Ráðið lýsir ánægju með þá vinnu sem þegar hefur farið fram og telur eðlilegt að tímaáætlun verði aðlöguð að því markmiði að tryggja vandaða niðurstöðu. Ráðið óskar eftir að fyrstu drög að framtíðarsýn verði lögð fram til umræðu á næsta fundi.
6.
Skólaskrifstofa Vestmannaeyja
Málsnúmer 202404083
Frh. af máli nr. 3 á fræðsluráðsfundar 411. Deildarstjóri fræðslu- og uppeldismála leggur fram aðgerðaráætlun til að bæta þjónustu við börn og fjölskyldur sem bíða eftir greiningu.
Í aðgerðaráætlunni leggur skólaskrifstofan til að óskað verði eftir viðbótar fjármagni í fjárhagsáætlun 2027 til að bæta tímabundið við stöðugildi sálfræðings. Ef ekki takist að ráða í stöðu sálfræðings verði heimild til að nýta fjármagnið í aðkeypta þjónustu. Er þetta viðbótarfjármagn hugsað til eins árs til að draga úr uppsöfnuðum biðlista eftir greiningu. Samhliða verði lögð vinna í heilstætt endurmat á verklagi, forgangsröðun og hvernig þörfum barna er mætt án þess að formleg greining liggi fyrir. Mikil uppsöfnun mála á biðlista eftir greiningum barna í leik- og grunnskóla kallar á heildstæða endurskoðun á núverandi fyrirkomulagi og verkferlum skóla- og stoðþjónustu. Mikilvægt er að greina ástæður fjölgunar greiningarbeiðna, endurmeta viðmið fyrir tilvísanir, forgangsröðun og möguleika á markvissri yfirferð biðlista.
Jafnframt þarf að skoða hvort hægt sé að mæta þörfum fleiri barna enn meira með snemmbærum stuðningsúrræðum, ráðgjöf og aðlögun námsumhverfis án þess að formleg greining sé forsenda þjónustu.
Markmiðið er að tryggja að börn fái viðeigandi stuðning á réttum tíma, nýta sérfræðiþekkingu með markvissari hætti og draga úr óþarfa uppsöfnun mála á biðlistum.
Ráðið styður umrædda aðgerðaráætlun og felur sviðsstjóra að fylgja henni eftir til bæjarráðs við vinnu fjárhagsáætlunar 2027

7.
Fjárhagsáætlun Vestmannaeyjabæjar 2027
Málsnúmer 202606031
Sviðsstjóri fjölskyldu- og fræðslusviðs kynnti málaflokk fræðslumála sem fellur undir fræðsluráð Vestmannaeyja, eftir fyrstu umræðu bæjarstjórnar vegna fjárhagsáætlunar 2027.

Ráðið þakkar sviðsstjóra kynninguna.