407. fundur

7. júlí 2026 kl. 12:00 - 13:10

Í fundarsal Fjölskyldu- og fræðslusviðs við Kirkjuveg

Nefndarmenn

Aníta Jóhannsdóttir formaður

Eyrún Haraldsdóttir aðalmaður

Óskar Jósúason aðalmaður

Rannveig Ísfjörð aðalmaður

Sonja Andrésdóttir aðalmaður

Starfsmenn

Helga Sigrún Þórsdóttir starfsmaður

Jón Pétursson starfsmaður

Dagskrá

1.

Þróunarsjóður leik-, grunn- og tónlistarskóla

Málsnúmer 201910096

Berglind Þórðardóttir kynnti þróunarverkefnið Leiðarljós og yfirlit yfir námsþætti og námsmat í stærðfræði á mið- og unglingastigi. Verkefnið hlaut styrk úr Þróunarsjóði leik-, grunn- og tónlistarskóla árið 2024.

Fræðsluráð þakkar kynninguna og fagnar þessu metnaðarfulla þróunarverkefni sem mun án efa nýtast vel fyrir GRV-Barnaskóla.

2.

Skimanir. Skimun í leik- og grunnskólum Vestmannaeyja. Athuganir. Rannsóknir.

Málsnúmer 201504054

Deildarstjóri fræðslu- og uppeldismála og sérkennsluráðgjafi leikskóla kynntu niðurstöður úr HLJÓM-2 skimun á Víkinni og Talnalykli í GRV. Niðurstöður sýna að markviss eftirfylgni og snemmtæk íhlutun skila góðum árangri, bæði hvað varðar málþroska og stærðfræðifærni nemenda. Sérstaklega var bent á að börn sem fengu stuðning í kjölfar HLJÓM-2 skimunar sýndu öll framfarir við endurmat.

Fræðsluráð þakkar kynninguna og lýsir yfir ánægju með niðurstöðurnar. Ráðið telur þær staðfesta mikilvægi reglubundinna skimana, snemmtækrar íhlutunar og markvissrar eftirfylgni til að styðja við námsframvindu barna.

Viðhengi

Hljóm-2 (2020 árg)

3.

Leikskólamál

Málsnúmer 201304072

Deildarstjóri fræðslu- og uppeldismála kynnti stöðu leikskólamála. Í maí sl. var öllum börnum sem orðin 12 mánaða í september nk. boðin leikskólavist frá hausti. Næsta úthlutun leikskólaplássa fer fram í janúar 2027 og er gert ráð fyrir að öllum börnum sem þá verða orðin 12 mánaða verði boðin leikskólavistun.

Fræðsluráð lýsir yfir ánægju með að hægt verði að bjóða öllum börnum sem náð hafa 12 mánaða aldri leikskólavist frá og með haustinu. Ráðið telur jafnframt mikilvægt að greina framtíðarþörf fyrir leikskólapláss.

Fræðsluráð felur sviðsstjóra fjölskyldu- og fræðslusviðs að vinna minnisblað fyrir næsta fund ráðsins þar sem metin verður þörf fyrir leikskólaplássum til næstu fimm ára og svo einnig til lengri tíma litið, meðal annars með hliðsjón af áætlaða íbúðafjölgun sem byggir á húsnæðisstefnu sveitarfélagsins.

4.

Framtíðarsýn og áherslur í menntamálum.

Málsnúmer 201411027

Núverandi framtíðarsýn Vestmannaeyjabæjar í menntamálum rennur út í lok árs. Rætt var um nauðsyn þess að endurskoða framtíðarsýnina og setja á fót starfshóp sem leiði þá vinnu.

Fræðsluráð telur mikilvægt að byggt verði á þeim góða grunni sem þegar hefur verið lagður í skólastarfi sveitarfélagsins. Skólar Vestmannaeyjabæjar standa sterkt og veita nemendum góða menntun og þjónustu. Mikilvægt er að endurskoðuð framtíðarsýn styðji við áframhaldandi þróun skólastarfs og taki mið af þeim áherslum sem lagðar hafa verið í verkefninu Kveikjum neistann: læsi og lesskilning, stærðfræði, náttúru- og umhverfisfræði, hreyfingu og einbeitingu, sem og jákvætt hugarfar.

Fræðsluráð samþykkir að skipa starfshóp um endurskoðun framtíðarsýnar í menntamálum. Í hópnum sitji:

Deildarstjóri fræðslu- og uppeldismála, formaður starfshóps.
Kennsluráðgjafi grunnskóla, ritari starfshóps.
Sérkennsluráðgjafi leikskóla.
Skólastjórar Grunnskóla Vestmannaeyja
Leikskólastjórar Kirkjugerðis og Sóla.
Fulltrúi leikskólakennara.
Fulltrúi kennara af yngsta stigi Grunnskóla Vestmannaeyja (Hamarskóla).
Fulltrúi kennara af mið- eða unglingastigi Grunnskóla Vestmannaeyja (Barnaskóla).
Aðstoðarskólastjóri 5 ára deildar Grunnskóla Vestmannaeyja.
Námsráðgjafi.
Fulltrúi foreldrafélags Grunnskóla Vestmannaeyja.

Fræðsluráð leggur áherslu á að vinna við endurskoðun framtíðarsýnar í menntamálum verði markviss og gagnsæ. Starfshópurinn skal vinna samkvæmt eftirfarandi verkáætlun:

September 2026: Vinna starfshóps hefst og gagnaöflun fer fram. Farið verður yfir núverandi framtíðarsýn, stöðu skólastarfs og áherslur til framtíðar.
Október 2026: Fyrstu drög að endurskoðaðri framtíðarsýn lögð fram og kynnt fræðsluráði.
Nóvember 2026: Önnur drög unnin með hliðsjón af ábendingum og umsögnum hagsmunaaðila, þar á meðal skólaráðs, foreldraráða leikskólanna, fulltrúa nemenda og ungmennaráðs.
Desember 2026: Lokafrágangur framtíðarsýnar, undirritun og afgreiðsla starfshóps. Tillaga lögð fyrir fræðsluráð til umfjöllunar og samþykktar.

5.

Erindisbréf til fulltrúa í ráðum skv. bæjarmálasamþykkt Vestmannaeyjabæjar 2026

Málsnúmer 202606149

Erindibréf til fulltrúa í Fræðsluráði Vestmannaeyja lagt fram.

Fræðsluráð þakkar kynninguna.

Viðhengi

Erindisbréf fyrir fræðsluráð lokaeintak

Fræðsluráð Vestmannaeyja