Fjölskyldu og tómstundarráð Vestmannaeyja
Fyrir liggur erindi ÍBV íþróttafélags þar sem óskað er eftir stuðningi Vestmannaeyjabæjar við umsókn félagsins um FIFA Arena við Hásteinsvöll og Týsheimili.
Gunnar Páll Hálfdánsson formaður ÍBV héraðssambands sat fundinn sem áheyrnarfulltrúi í þessu erindi.
Í erindinu er meðal annars óskað eftir því að Vestmannaeyjabær staðfesti stuðning við verkefnið, styðji fyrirhugaða staðsetningu, taki þátt í nauðsynlegum undirbúningi og staðfesti vilja til samstarfs við ÍBV um framgang verkefnisins.
Erindi og fylgigögn bárust eftir að fundarboð ráðsins hafði verið gefið út og er erindið því tekið fyrir með afbrigðum.
Fjölskyldu- og tómstundaráð bendir á að með verkefninu fylgja fjárhagslegar skuldbindingar fyrir Vestmannaeyjabæ, meðal annars vegna jarðvinnu og undirbúnings svæðis. Samkvæmt fyrirliggjandi gögnum þarf sveitarfélagið að tryggja útgröft og undirbúning, burðarlag, steypta kantbita, frárennsli og fullfrágengið yfirborð fyrir uppsetningu vallarkerfisins. Nákvæm kostnaðaráætlun fylgdi ekki erindi ÍBV en samkvæmt frumáætlun er kostnaður við slíkar framkvæmdir áætlaður um 15–24 m.kr. með VSK, eftir því hvaða útfærsla á undirlagi verður fyrir valinu.
Fjölskyldu- og tómstundaráð telur sér ekki fært að verða við erindi ÍBV þar sem ráðið hefur ekki heimild til að skuldbinda Vestmannaeyjabæ til fjárútláta vegna verkefnisins. Beiðnir sem fela í sér fjárhagslegar skuldbindingar af þessu tagi þurfa að berast með nægum fyrirvara og fara til umfjöllunar hjá bæjarráði.
Fjölskyldu- og tómstundaráð hafnar því erindi ÍBV eins og það liggur fyrir.
Fjölskyldu- og tómstundaráð samþykkir tillögu sviðsstjóra um að efla starfsemi Heimaeyjar vinnu- og hæfingarstöðvar sem virkni- og hæfingarstöðvar, með aukinni áherslu á virkni og hæfingu í samræmi við starfsemi sambærilegra hæfingarstöðva hjá öðrum sveitarfélögum.
Samhliða þessum áherslubreytingum samþykkti ráðið að segja upp samningi við Endurvinnsluna frá og með 1. febrúar nk. Sú ákvörðun er liður í því að efla starfsemi Heimaeyjar og skapa aukið svigrúm til að mæta þörfum þeirra einstaklinga sem þurfa á virkni og hæfingu að halda.
Ekki er um að ræða skerðingu á þjónustu Heimaeyjar heldur fyrst og fremst breytingu á áherslum og fyrirkomulagi þjónustunnar, með það að markmiði að mæta betur ólíkum þörfum þjónustuþega.
Jafnframt eru fyrirhugaðar endurbætur á húsnæði Heimaeyjar vinnu- og hæfingarstöðvar til að bæta aðstöðu og laga húsnæðið betur að starfseminni. Áður en ráðist verður í þær framkvæmdir verður sérstaklega hugað að því hvernig nýta megi það rými sem Endurvinnslan hefur til umráða í dag, með hliðsjón af framtíðarþörfum Heimaeyjar og fjölgun þeirra einstaklinga sem þurfa á virkni og hæfingu að halda.
Markmiðið með breytingunum er þannig að styrkja Heimaey sem virkni- og hæfingarstöð og tryggja að starfsemi, aðstaða og húsnæði geti sem best mætt þörfum þjónustuþega til framtíðar.