Fjölskyldu og tómstundarráð Vestmannaeyja

Fjölskyldu- og tómstundaráð lýsir yfir vonbrigðum með að gildandi laga- og reglugerðarákvæði leiði til þess að ekki sé unnt að bjóða öllum börnum sem lokið hafa 7. bekk þátttöku í Vinnuskóla Vestmannaeyjabæjar á sömu forsendum. Af 56 umsækjendum verða 34 börn ekki orðin 13 ára við upphaf starfstímans og er því samkvæmt lögum nr. 46/1980 um aðbúnað, hollustuhætti og öryggi á vinnustöðum og reglugerð nr. 426/1999 um vinnu barna og unglinga ekki heimilt að ráða þau til starfa á því tímabili sem um ræðir.

Ráðið telur að þessi framkvæmd leiði til mismununar milli jafnaldra sem eingöngu byggir á fæðingardegi innan sama árgangs og samræmist illa sjónarmiðum um jafnræði og meðalhóf. Ráðið felur sviðsstjóra að óska eftir samtali við Félags- og húsnæðismálaráðuneytið um málið, kanna hvort heimildir séu til sveigjanlegri útfærslu og koma á framfæri þeirri afstöðu ráðsins að mikilvægt sé að tryggja öllum börnum í sama árgangi sambærileg tækifæri til þátttöku í vinnuskóla sveitarfélagsins.