Lagning ljósleiðara í þéttbýli hafin
Undanfarna mánuði hefur Vestmannaeyjabær unnið að lagningu ljósleiðara í dreifbýli sveitarfélagsins. Lagningin var hluti af verkefninu "Ísland Ljóstengt". Þann 1. júní s.l. var þeim áfanga náð að verkefninu var lokað og opnað fyrir sölu inn á netkerfið.
Kerfið var hannað af verkfræðistofunni Eflu og sáu Þjótandi ehf um jarðvinnu og Geisli ehf um blástur á ljósleiðara og tengingu kerfisins.
Samhliða dreifbýlisverkefninu hefur verð unnið að hönnun ljósleiðaranets í þéttbýlinu og nú er svo komið að framkvæmdir því tengdu eru að hefjast. Boðnir hafa verið út fyrstu tveir áfangarnir og er það Línuborun ehf sem tekur að sér að jarðvinnuna við þessa áfanga.
Lagt var upp með að byrja á þeim svæðum þar sem að netsamband er sem verst í sveitarfélaginu og verður byrjað á vesturbænum, og röralagnir lagðar í Dverghamar, Búhamar, Áshamar, Foldahraun og Bessahraun. Áætlað að það verk taki rúma tvo mánuði og að því loknu verður blástur boðinn út í þeim áfanga og hægt að hefjast handa við að tengja þessi hús.
Að jarðvinnu lokinni í fyrsta áfanga þá mun Línuborun færa sig austur i bæ og hefja jarðvinnu þar í haust. Það svæði er ekki eins skýrt afmarkað og fyrsti áfangi en sjá má skiptingu á milli áfanga á meðfylgjandi myndum. Rétt er þó að taka það fram að verkefnið mun óhjákvæmilega taka breytingum á verktímanum og því er skiptingin ekki alveg 100% örugg.
Vestmannaeyjabær fagnar því að nú skuli sú staða vera komin upp að það styttist í að allir íbúar þess fái að njóta sömu netgæða og aðrir landsmenn. Jafnframt biðja aðstandendur verkefnisins bæjarbúa að sýna okkur skilning og þolinmæði á meðan á framkvæmdum stendur. Þetta er stórt verkefni sem er bæði flókið í undirbúningi sem og framkvæmd.
Fyrsti áfangi
Annar áfangi
Hægt er að skoða pdf skjöl sem sýna skiptinguna á milli áfanga betur
- 3042-015-TEI-202B_Svaedismynd-1-Afangi-1a
- 3042-015-TEI-252B_Svaedismynd-1-Afangi-1b
- 3042-015-TEI-203B_Svaedismynd-2-Afangi-1a
- 3042-015-TEI-253B_Svaedismynd-2-Afangi-1b