5.febrúar 2020 - 11:57

Skýrsla um loðnubrest 2019

Út er komin skýrsla um stöðu, áhrif og afleiðingar loðnubrests 2019 fyrir Vestmannaeyjar. Skýrslan er unnin að beiðni bæjarstjórnar af Hrafni Sævaldssyni sérfræðingi hjá Þekkingarstetri Vestmannaeyja. 
 
Helstu niðurstöður eru þær að loðnubrestur hefur bein áhrif á 350 starfsmenn og ígildi 60 ársverka. Tapaðar launtekjur í Vestmannaeyjum eru a.m.k. 1.000 m.kr. Tekjutap útgerðarfyrirtækja er um 7.600 m.kr. og annara fyrirtækja um 900 m.kr. Vestmannaeyjabær og Vestmannaeyjahöfn verða af um 160 m.kr. sökum þessa.

 

Á mánudaginn var kynnti bæjarstjóri greininguna fyrir sjávarútvegsráðherra.

 

Bæjarráð fundaði í gær þar sem m.a. kom fram að áhrif loðnubrestsins 2019 í Vestmannaeyjum væru mjög mikil á samfélagið allt, ekki bara þá sem starfa í sjávarútvegi. Fyrirtæki og fólk í Vestmannaeyjum hafi tekið í sig mikið fjárhagshögg vegna ársins 2019, en annar loðnubrestur yrði Vestmannaeyjum mjög erfiður. Rúmlega 30% allra veiðiheimilda í loðnu eru hjá fyrirtækjum í Vestmannaeyjum. Afleiðingar af því er ekki bara mikið tekjutap samfélagsins alls, heldur eru töluverðar líkur á að markaðir tapist sökum þessa. Loðnubrestur hefði ekki aðeins áhrif á Vestmannaeyjar og þau sveitarfélög sem byggja afkomu sína á sjávarútvegi, heldur þjóðarbúið í heild. Það er lykilatriði að stjórnvöld beiti sér fyrir auknum rannsóknum á loðnu. Einnig vöktun og leit að loðnu næstu vikur til þess að hægt sé að mæla það magn af loðnu sem er við Ísland og vonandi gefa út kvóta í framhaldinu.

Verði ekki gefin út loðnukvóti annað árið í röð munu bæjaryfirvöld óska eftir fundi með sjávarútvegsráðherra, sveitarstjórnaráðherra og fjármálaráðherra til að ræða mögulegar mótvægisaðgerðir við aflabresti.

Skýrsluna er hægt að finna hér

 

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159