22.mars 2019 - 08:56

Vestmannaeyjar 100 ára – Dagskráin heldur áfram

Jói Listó í Einarsstofu

 
Dagskrá vegna 100 ára afmælis Vestmannaeyja heldur áfram og nú stendur yfir sýning á verkum Jóhanns Jónssonar, Jóa Listó í Einarsstofu. Svo tekur við hver viðburðurinn af öðrum. Næst er það Kvikmyndahátíð í byrjun maí en hápunkturinn er fimmta júlí. Þá mun afmælisnefnd efna til mikillar veislu í tali og tónum. Verða í boði glæsileg skemmtiatriði  fyrir fólk á öllum aldri.

 

Byrjað með glæsibrag

 

Eins og undanfarin ár eru viðburðir í Safnahúsi sem eru kynntir jafnóðum. Þegar hefur verið haldin sýning á verkum Kjarvals í eigu Vestmannaeyjabæjar. Stórskemmtileg sýning á myndum eftir nemendur Grunnskólans sem skoðuðu lífið í Eyjum með sínum augum og þar á undan var sýning á frímerkjum sem Pósturinn hefur gefið út og tengjast Vestmannaeyjum í tilefni af afhjúpun afmælisfrímerkis vegna 100 ára afmælisins. Síðast var svo sýning á verkum eftir Eyjakonur. Fjölbreytt og skemmtileg sýning.

 

Af öðrum viðburðum má nefna hátíðarfund bæjarstjórnar 14. febrúar, bæjarstjórnarfund unga fólksins 15. febrúar og málstofu um stöðu Vestmannaeyja í nútíð og framtíð 17. febrúar. Allt mjög vel heppnaðir viðburðir.

 

Fjölbreyttur, metnaðarfullur og vandvirkur listamaður

 

Fimmtudaginn 21. mars var opnuð sýning á verkum Jóhanns Jónssonar, Jóa Listó, sem varð sjötugur í febrúar á síðasta ári. Hugmyndina á Gunnar Júlíusson, myndlistarmaður og Eyjamaður sem fékk Kára Bjarnason, forstöðumann Safnahússins til liðs við sig. Jói sló til en fannst ekki við hæfi að efna til afmælis- og heiðurssýningar en það eru rúm 20 ár síðan hann hélt einkasýningu síðast.

 

Sýningin spannar ótrúlega fjölbreyttan feril listamannsins sem sló í gegn með vatnslitamyndum sínum á síðustu öld. Síðustu 20 árin hefur hann komið að mjög fjölbreyttum verkefnum, sem m.a. snúa að öryggismálum sjómanna, hönnun frímerkja og bókakápa.

Það er svo sannarlega hægt að mæla með sýningunni en um hana segir Gunnar:

 

„Mér finnst vera kominn tími til að draga verk hans aftur fram í dagsljósið og vekja athygli á hversu fjölbreyttur, metnaðarfullur og vandvirkur Jói er sem listamaður. Svona breidd er sjaldséð,“ segir Gunnar.  Sýningin verður opin til 31. mars.

 

Forvitnileg kvikmyndahátíð

 

Ákveðið er að halda kvikmyndahátíð og verður hún tvískipt. Fyrri hlutinn verður í maí og seinni á Safnahelgi í byrjun nóvember. Í hvort skipti verða sýndar valdar myndir fimm daga í röð í Bíóinu í Kviku. Hátíðin er haldin í góðu samstarfi við Svavar Vignisson, sem rekur Bíóið. Mikið er til af myndum, bæðí leiknum og heimildarmyndum sem tengjast Vestmannaeyjum. Ná þær allt aftur til þriðja áratugar síðustu aldar. Það verður vandi að velja og hafna en hægt er að lofa spennandi dagskrá þar sem margt kemur á óvart.

 

Aðalhátíðin í byrjun júlí

 

Aðalahátíðarhöldin verða svo fyrstu dagana í júlí og tengjast goslokahátíðinni. Annan og þriðja júlí verður dreift mjög myndarlegu afmælisblaði sem Sara Sjöfn Grettisdóttir, ritstjóri Eyjafrétta ritstýrir. Þar verður farið yfir sögu Vestmannaeyja, stöðuna í dag og því sem framundan er. Sara Sjöfn lofar fjölbreyttu og skemmtilegu blaði og ljóst er að af nógu er að taka í 100 ára sögu Vestmannaeyja, bæði í myndum og texta. Blaðinu verður dreift í öll hús í Vestmannaeyjum.

 

Aðalhátíðin er svo föstudaginn fimmta júlí. Þar ættu allir að finna eitthvað við sitt hæfi. Hátíðin fer fram á Skansinum sem heill heimur útaf fyrir sig.

 

Dagskráin er enn í mótun en á Skansinum verða flutt stutt ávörp og tónlist auk annarra atriða sem enn er verið að móta. Síðdegis verður móttaka bæjarstjórnar í Eldheimum þar sem forseti Íslands og forsætisráðherra verða á meðal gesta.

 

Stórtónleikar

 

Um kvöldið, verða stórtónleikar þar sem fjöldi landsþekktra listmanna koma fram með öflugri innkomu tónlistarfólks úr Eyjum. Tónleikarnir eru í boði bæjarstjórnar og er búist við mikilli aðsókn. Því er ákveðið að halda tvenna tónleika, kl. 18.00 og 21.00.

 

Um kvöldið og nóttina verður Skvísusundið miðpunktur mikillar tónlistarhátíðar þar sem allir geta tekið sungið með sínu lagi.

 

Safnahelgin fær veglegan sess

 

Lokatónn 100 ára afmælisársins verður svo á Safnahelgi í byrjun nóvember. Safnahelgi hefur fest sig í sessi sem ein allsherjar menningarveisla. Dagskrá er enn í mótun en þessa helgi verður seinni hluti kvikmyndahátíðar auk annarrar dagskrár.

 

Fleira í pípunum

 

Þetta er ekki tæmandi dagskrá afmælisársins og verða viðburðir kynntir með góðum fyrirvara. Af þessu má sjá að framundan er glæsileg afmælisdagskrá og er von á fjölda gesta.

 

Í afmælisnefnd eru Arnar Sigurmundsson, Hrefna Jónsdóttir, Stefán Óskarsson og með þeim eru Angantýr Einarsson, og Kári Bjarnason, og Ómar Garðarsson.

 

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159