19.11.2019

Bæjarráð - 3113

 
 Bæjarráð Vestmannaeyja - 3113. fundur

Bæjarráðs Vestmannaeyja

haldinn í fundarsal Ráðhúss,

19. nóvember 2019 og hófst hann kl. 12:00

 

 

Fundinn sátu:

Njáll Ragnarsson formaður, Hildur Sólveig Sigurðardóttir aðalmaður, Elís Jónsson varamaður og Íris Róbertsdóttir bæjarstjóri.

 

 

Fundargerð ritaði:  Angantýr Einarsson, framkvæmdastjóri stjórnsýslu- og fjármálasviðs

 

 

 

Dagskrá:

 

1.

Umræða um samgöngumál - 201212068

 

Bæjarráð ræddi nýjan samning við Björgun um dýpkun Landaeyjahafnar. Samkvæmt samningnum verður dýpkun haldið áfram óslitið út janúar og dýpkunarskipið og áhöfn staðsett í Vestmannaeyjum. Í mars verður svo dýpkað eftir gamla samningnum, með einni veigamikilli breytingu, þ.e. leitast verður við að fá aðila með öflugri og afkastameiri tækjakost en Björgun hefur yfir að ráða. Það má því gera ráð fyrir að það taki skemmri tíma að opna höfnina aftur, komi til þess að hún lokist í vetur vegna sandburðar.

   
 

Niðurstaða

 

Bæjarráð fagnar nýjum samningi Vegagerðarinnar um dýpkun í vetur og ráðstafanir til að fá afkastamikla aðila til að halda áfram dýpkun í vor.

     

2.

Tillaga héraðsskjalavarða um sameiningu fjögurra skjalasafna á Suðurlandi - 201903067

 

Rædd var tillaga héraðsskjalavarða um samvinnu eða sameiningu skjalasafnanna á Suðurlandi. Bæjarráð hefur áður fjallað um tillögur héraðsskjalavarða á fundi sínum 30. apríl sl. Til stóð að ræða umrædda tillögu á ársfundi Sambands sunnlenskra sveitarfélaga sem haldinn var í október sl., en sú varð ekki raunin.

   
 

Niðurstaða

 

Bæjarráð felur bæjarstjóra að óska eftir símafundi með Þorsteini Tryggva Mássyni, héraðsskjalaverði Héraðsskjalasafns Árnesinga, til þess að óska eftir frekari upplýsingum um aukna samvinnu héraðsskjalasafnanna.

     

3.

Umsagnir frá Alþingi - bæjarráð - 201904142

 

Til umræðu var beiðni Alþingis um umsagnir um tillögu til þingsályktunar um þyrlupall í Vestmannaeyjum. Samkvæmt tillögunni er samgöngu- og sveitarstjórnarráðherra falið að gera ráðstafanir til að Isavia geti hannað og staðsett þyrlupall á Heimaey til að auka enn frekar öryggi í sjúkra- og neyðarflugi til Vestmannaeyja og verkinu verði lokið eigi síðar en árið 2021.

   
 

Niðurstaða

 

Bæjarráð tekur undir með flutningsmönnum tillögunnar og telur mikilvægt að grípa til ráðstafana til að tryggja örugga sjúkraflutninga í neyðartilvikum og stytta viðbragðstímann. Ljóst er að núverandi fyrirkomulag með staðsetningu sjúkraflugs á Akureyri er óásættanlegt.

     

4.

Fundargerðir Sambands íslenskra sveitarfélaga og SASS - 201907118

 

Til upplýsinga var lögð fyrir bæjarráð fundargerð nr. 550, frá fundi stjórnar Sambands sunnlenskra sveitarfélaga sem haldinn var 23. október sl.

     

5.

Safnahelgin 7.-17. nóvember 2019 - 201911060

 

Glæsilegri Safnahelgi í Vestmannaeyjum er nýlokið og óhætt að fullyrða að vel hafi tekist til. Fjöldi fjölbreyttra viðburða var á dagskránni í ár sem stóð yfir í 11 daga, frá 7. til 17. nóvember. Enn eru dagskrárliðir um næstu tvær helgar sem tengjast 100 ára kaupstaðarafmælinu og Safnahelginni.

   
 

Niðurstaða

 

Bæjarráð vill senda öllum þeim sem komu að skipulagningu og þátttöku Safnahelgarinnar sínar bestu þakkir og hamingjuóskir með frábæra og metnaðarfulla dagskrá. Þá eru bæjarbúar hvattir til að sækja þá viðburði sem framundan eru.

     

6.

Beiðni um umsögn vegna skoteldaleyfis - 201911038

 

Lögreglustjórinn í Vestmannaeyjum hefur óskað eftir umsögn Vestmannaeyjabæjar um umsókn Björgunarfélags Vestmannaeyja um leyfi til að selja skotelda í húsnæði sínu við Faxastíg 38 frá 28. desember 2019 til og með 4. janúar 2020.

   
 

Niðurstaða

 

Bæjarráð veitir umsókninni jákvæða umsögn að því gefnu að farið sé að skilmálum embættis lögreglustjóra um slíka sölu skotelda. Bæjarráð samþykkir einnig fyrir sitt leyti opnunartíma skoteldasölunnar.
Umsögnin er háð ríkri kröfu um frágang og snyrtimennsku og áskilur bæjarráð sér rétt til að láta þrífa umhverfi sölustaðarins á kostnað rekstraraðila ef þörf krefur.

     

7.

Trúnaðarmál lögð fyrir bæjarráð - 200708078

 

Afgreiðsla trúnaðarmála er færð í sérstaka trúnaðarfundargerð.

     

 

 

 

 

                                                                                           

Fleira ekki gert. Fundi slitið kl. 13:00

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159