28.01.2016

Bæjarstjórn - 1507

 
 Bæjarstjórn Vestmannaeyja - 1507. fundur

 

haldinn í Einarsstofu safnahúsi,

28. janúar 2016 og hófst hann kl. 18.00

 

 

Fundinn sátu:

Hildur Sólveig Sigurðardóttir forseti, Elliði Vignisson 1. varaforseti, Páll Marvin Jónsson aðalmaður, Trausti Hjaltason aðalmaður, Birna Þórsdóttir aðalmaður, Stefán Óskar Jónasson aðalmaður og Auður Ósk Vilhjálmsdóttir aðalmaður.

 

Fundargerð ritaði:  Rut Haraldsdóttir, Framkvæmdastjóri stjórnsýslu og fjármálasviðs.

 

Forseti bæjarstjórnar leitaði eftir samþykkir fundarins að taka inn með afbrigðum fyrsta mál á dagskrá fundarins, útboð nýrrar Vestmannaeyjaferju og rekstur hennar. Var það samþykkt með sjö samhljóða atkvæðum.

 

Dagskrá:

 

1.

201212068 - Umræða um samgöngumál

 

Væntalegt útboð nýrrar Vestmannaeyjaferju og rekstur hennar

 

Á fundinum kom fram að í gær hafi bæjarstjóri og formaður bæjarráðs átt fund með samgönguyfirvöldum vegna væntanlegs útboðs á nýrri Vestmannaeyjaferju og reksturs hennar. Á fundinum gerðu fulltrúar Vestmannaeyjabæjar grein fyrir eftirfarandi áhersluatriðum bæjarstjórnar:

1. Bæjarráð hefur þegar lagst eindregið gegn því að ferjan verði í einkaeigu og er það hér með ítrekað.
Siglingar í Landeyjahöfn eru þjóðvegurinn til Eyja. Einkaframkvæmdir í vegakerfinu hafa eingöngu verið farnar þegar val er um aðra leið svo sem hvað varðar jarðgöngin undir Hvalfjörðinn. Eðlileg og sanngjörn krafa er að þjóðvegurinn til Eyja gegni sömu lögmálum.

2. Bæjarráð hefur þegar lagst eindregið gegn því að samið verði um rekstur ferjunnar til lengri tíma en 3 til 5 ára í senn og þá með skýrum og virkum uppsagnarákvæðum.
Siglingar í Landeyjahöfn eru þjóðvegurinn til Eyja. Mikilvægt er að slík grunnþjónusta sé ætíð kvik og hægt sé að skipta um rekstraraðila hratt og örugglega ef þörf er á. Í skemmri samningum er einnig aukinn hvati til árangurs í þjónustu.

3. Gjaldtaka fyrir afnot af þjóðvegi
Gerð er krafa um að gjaldtaka í Herjólf taki mið af því að um er að ræða þjóðveginn til Eyja. Þannig ætti eingöngu að greiða fyrir bíl sambærilegt verð og kosta myndi að aka þessa leið. Ekki ætti að rukka sérstaklega fyrir farþega í bílunum og hófstillt verð fyrir aðra farþega.

4. Fargjald í Þorlákshöfn
Bæjarstjórn Vestmannaeyja hafnar með öllu áformum um að hærra verð sé tekið fyrir siglingar í Þorlákshöfn en í Landeyjahöfn. Eðlilegt og sanngjarnt er að eitt verð gildi fyrir báðar leiðir og fráleitt að rukka sérstaklega þegar siglt er um lengri og erfiðari leið vegna náttúrulegra aðstæðna svo sem veðurs og sandburðar.

5. Frátafir og siglingar í Þorlákshöfn
Vonir hafa staðið til að frátafir siglinga í Landeyjahöfn verði ekki meiri en 10%. Ákvarðanir um að breyta hönnun þannig að ferjan verði stærri og afkastameiri mun m.a. verða til þess að frátafir í siglingum í Landeyjahöfn verði meiri en fyrra mat gerði ráð fyrir. Bæjarstjórn vill frá upphafi að samgönguyfirvöld séu meðvituð um að frátafir í siglingum í Landeyjahöfn geta því orðið verulega umfram fyrri áætlanir þegar veður eru verst. Þannig kæmi það bæjarstórn ekki á óvart þótt að í 20 til 30 daga þurfi ferjan að sigla í Þorlákshöfn. Eðlileg krafa er því að að strax frá upphafi verði gert ráð fyrir þeim veruleika. Með þetta í huga fer bæjarstórn fram á eftirfarandi:

- Skipið sé frá upphafi hannað með tilliti til þess að í allt að 20-30 daga á ári þurfi það að sigla í Þorlákshöfn og sjóhæfni þess sé í samræmi við þann veruleika.
- Svefnaðstaða (kojur) verði fyrir að lágmarki 40 manns
- Gjaldskrá á báða siglingastaði sé eins, ekki sé tekið aukagjald fyrir siglingu í Þorlákshöfn (sjá lið 4).
- Þjónusta um borð sé í samræmi við að sigling geti tekið allt að 3 tíma.


6. Ferðafjöldi
Ítrekað í kynningu á verkefninu hefur bæjarstjórn og Eyjamönnum öllum verið kynnt að takmörkun á stærð skipsins verði mætt með stórauknum fjölda ferða. Farið er fram á að ferðir í vetraráætlun verði að lágmarki 5 ferðir á dag og 7 ferðir á dag yfir sumartímann. Til vara er farið fram á að ferðir í vetraráætlun verði að lágmarki 4. Þá leggur bæjarstjórn það til að inn í útboðsgögn verði byggð sjálfvirk fjölgun ferða þegar biðlistar valda orðið óþægindum fyrir notendur.

7. Árstíðarbundin áætlun
Bæjarstjórn Vestmannaeyja leggur áherslu á að áætlun skipsins taki mið af þeim breytta veruleika sem fylgt hefur auknu flæði fólks og vaxandi ferðaþjónustu. Sumartími í ferðaþjónustu í Vestmannaeyjum spannar í það minnsta 1. maí til 30. sept. Þannig kemur til að mynda mikill fjöldi ferðamanna á haustin til að njóta pysjutímans (a.m.k. út sept. og fram í okt) og á sama hátt er tíminn þegar lundinn er að setjast upp og farfuglar að koma til sumardvalar (apríl og maí) mjög eftirsóknarverður fyrir ferðamenn. Því er farið fram á að árstíðaráætlun skiptist svo:
Vetraráætlun frá 1. okt til 30. apríl. - Sumaráætlun frá 1. maí til 30. sept.

8. Flutningsgeta
Þekkt er að hámarksflutningsgeta skipsins er mismunandi á sumrin og veturna. Farið er fram á að þegar sumaráætlun er í gildi (1. maí til 30. sept) sé flutningsgeta skipsins 550 farþegar.


9. Aukaferðir
Samfélagið í Vestmannaeyjum er með öllu háð samgöngum á sjó. Með siglingum Herjólfs stjórna samgönguyfirvöld lífsgæðum bæjarbúa. Ítrekað gerist það að aukinn sveigjanleika þarf til að mæta sérstökum þörfum. Þannig getur það komið til að sigla þurfi aukaferð vegna stórs viðburðar á sviði íþrótta eða að bæta við ferð seint um kvöld til að koma gestum á bæjarhátíðum (goslok, Þrettándi og fl.) til síns heima. Því er eindregið óskað eftir því að í útboði verði boðið fast verð í aukaferðir, annars vegar þegar verið er að bæta ferð inn í áætlun (milli ákveðinna ferða) og hins vegar þegar ferð er bætt inn í utan áætlunnar.

Þá er einnig óskað eftir því að boðin verði út ákveðinn pakki af ferðum (t.d. 30 til 50 ferðir) sem bæjaryfirvöld í Vestmannaeyjum geta í samráði við Vegagerðina fundið stað í viðbót við áætlun.

10. Bókunarkerfið
Það bókunarkerfi sem nú er unnið er eftir er afleitt og ekki boðlegt að áfram verði unnið á forsendum þess. Þá leggur bæjarstjórn Vestmannaeyja þunga áherslu á að hægt verði að bóka a.m.k. 2 ferðir á dag 12 mánuði fram í tímann innan vetraráætlunar og í allar ferðir í sumaráætlun. Slíkt er gríðarlega mikilvægt fyrir t.d. ferðaþjónustu enda skipuleggja ferðaskrifstofur sig a.m.k. ár fram í tímann.

11. Helgidagar
Enn og aftur er minnt á að þjónustustig Herjólfs stjórnar lífsgæðum í Vestmannaeyjum. Í samræmi við nútíma kröfur er gerð krafa um að ferjan sigli alla daga ársins og að lágmarki 3 ferðir á stórhátíðum. Að rjúfa samgöngur við Vestmannaeyjar á stórhátíðardögum er eins og að loka Grindavíkurvegi eða Vesturlandsvegi þessa daga. Slíkt er ekki boðlegt.


12. Þjónusta í landi
Bæjarstjórn hvetur til þess að í útboði sé tryggt að þjónusta í landi sé í samræmi við mikilvægi hennar. Gera þarf ríka kröfu um rúman opnunatíma, öfluga símaþjónustu og skilvirkar upplýsingaveitur. Þá þarf aðstaða í landi að taka mið af þeim mikla fjölda sem fer þar um.


13. Þjónusta um borð
Bæjarstjórn Vestmannaeyja hvetur til þess að þjónusta um borð í ferjunni verði í samræmi við að um er að ræða fólksflutninga og ferðaþjónustu. Þannig sé til að mynda gerð krafa um nettengingu, góða leikaðstöðu fyrir börn, veitingaþjónustu og ýmislegt fl.

Bæjarstjórn tekur heilshugar undir þessi áhersluatriði og minnir að lokum á einróma samþykkt bæjarstórnar þess efnis að tafarlaust verði ráðist í smíði nýrrar Vestmannaeyjaferju og smíðatími hennar nýttur til að gera nauðsynlegar breytingar á Landeyjahöfn. Einnig er minnt á að skv. nýrri könnun Gallup eru 86% bæjarbúa fylgjandi þessari stefnu bæjarstjórnar.

Elliði Vignisson (sign)
Páll Marvin Jónsson (sign)
Trausti Hjaltason (sign)
Hildur Sólveig Sigurðardóttir (sign)
Birna Þórsdóttir (sign)
Stefán Jónasson (sign)
Auður Ósk Vilhjálmsdóttir (sign)

Ályktunin var samþykkt með sjö samhljóða atkvæðum.

 

   

2.

201512012F - Umhverfis- og skipulagsráð Vestmannaeyja frá 21. desember s.l. nr. 239

 

Liðir 1-7 liggja fyrir til staðfestingar.

 

Liðir 1-7 voru samþykktir með sjö samhljóða atkvæðum.

 

   

3.

201601001F - Bæjarráð Vestmannaeyja frá 5. janúar s.l. nr. 3015

 

Liðir 1-4 liggja fyrir til staðfestingar.

 

Liðir 1-4 voru samþykktir með sjö samhljóða atkvæðum.

 

   

4.

201601003F - Framkvæmda- og hafnarráð Vestmannaeyja frá 6. janúar sl. nr. 186

 

Liður 3 liggur fyrir til umræðu og staðfestingar.
Liðir 1,2 og 4 liggja fyrir til staðfestingar.

 

Við umræðu á 3 lagði Stefán Óskar Jónasson fram svohljóðandi bókun:
Við hjá Eyjalistanum tökum undir bókun Georg Eiðs um að betur hefði mátt fara að verklagi ráðningu nýs slökkvilisstjóra.
Stefán Óskar Jónasson (sign)
Auður Ósk Vilhjálmsdóttir (sign)

D listinn lagði fram svohljóðandi bókun:
Öllum verkferlum og starfsreglum var fylgt í málinu og því teljum við ásakanir fulltrúa E-lista innantómt pólitískt þvarg og lýsum fullum stuðningi við þá embættismenn bæjarins sem komu að þessari ráðningu. Fulltrúar meirihlutans skora hinsvegar á fulltrúa minni hlutans að leggja til breytingar á verkferlum varðandi mannaráðningar ef þeir telji illa að ráðningunni staðið.
Hildur Sólveig Sigurðardóttir (sign)
Elliði Vignisson (sign)
Páll Marvin Jónsson (sign)
Trausti Hjaltason (sign)
Birna Þórsdóttir (sign)

Liður 3 var samþykktur með sjö samhljóða atkvæðum.
Liðir 1, 2 og 4 voru samþykktir með sjö samhljóða atkvæðum.

 

   

5.

201601004F - Umhverfis- og skipulagsráð Vestmannaeyja frá 18. janúar s.l. nr. 240

 

Liður 1 liggur fyrir til umræðu og staðfestingar.
Liðir 2-12 liggja fyrir til staðfestingar.

 

Liður 1 var samþykktur með sjö samhljóða atkvæðum.
Liður 2-12 var samþykktur með sjö samhljóða atkvæðum.

 

   

6.

201601007F - Bæjarráð Vestmannaeyja frá 19.janúar s.l. nr. 3016

 

Liður 2 liggur fyrir til umræðu og staðfestingar.
Liðir 1 og 3 liggja fyrir til staðfestingar.

 

Liður 2 var samþykktur með sjö samhljóða atkvæðum.
Liðir 1 og 3 voru samþykktir með sjö samhljóða atkvæðum.

 

   

7.

201601005F - Fjölskyldu- og tómstundaráð nr. 20.janúar s.l. nr. 173

 

Liður 4 liggur fyrir til umræðu og staðfestingar.
Liðir 1-3 og 5 liggja fyrir til staðfestingar.

 

við umræðu um lið fjögur lagði Stefán Óskar Jónasson fram svohljóðandi bókun:
Í þessari fundargerð, fjölskyldu- og tómstundaráðs nr. 173 á að taka ákvörðun um tilboð í ræstingu á Hraunbúðum. Ekki liggur fyrir hvaða tilboð á að taka. Get ég ekki tekið ákvörðun í þessu máli. Kostnaðaráætlun Vestmannaeyjabæjar hljóðar upp á 1.134.667 krónur á mánuði. Læsta tilboðið var frá ISS 1.122.832 krónur á mánuði. Verði lægsta tilboði tekið sparar Vestmannaeyjabær sér aðeins 11.835 krónur á mánuði, sem gera 142.020 krónur á ári. Verði næstlægsta tilboði tekið, sem hljóðar uppá 1.335.222 krónur á mánuði, verður 200.555 krónur dýrari á mánuði eða 2.406.660 krónur dýrara á ári, miðað við kostnaðaráætlun Vestmannaeyjabæjar.
Í fundargerð fjölskyldu- og tómstundaráðs nr. 170 þann 18. nóvember 2015, liður 1: - Leitað verði tilboða í ræstingu á Hraunbúðum. Vestmannaeyjabær áskilur sér rétt til að hafna öllum tilboðum reynist þau ekki hagstæðari en núverandi fyrirkomulag.

Legg ég því til að hætt verði við útboð á ræstingu á Hraunbúðum þar sem því markmiði finnst mér ekki hafa verið náð.
Stefán Óskar Jónasson (sign)

D listinn lagði fram svohljóðandi bókun:
Meirihluti bæjarstjórnar lýsir furðu sinni yfir bókun bæjarfulltrúans Stefáns Jónassonar þar sem málið var einungis til kynningar í ráðinu. Verið er að skoða áhrif lægsta tilboðsins á starfsemi Hraunbúða þar sem að tilboðið fellur innan rúmri tímaramma en gert var ráð fyrir. Að öðru leyti fellur lægsta tilboðið í verkið innan þess ramma sem kostnaðaráætlun Vestmannaeyjabær gerir ráð fyrir. Meirihluti bæjarstjórnar bendir jafnframt á að í bókuninni er stuðst við rangar samanburðartölur.

Vestmannaeyjabær áskyldi sér rétt til að hafna öllum tilboðum og gæti vel farið svo að það verði niðurstaðan og mun sú ákvörðun byggja á yfirferð starfsmanna bæjarins á tilboðum í verkið.
Hildur Sólveig Sigurðardóttir (sign)
Elliði Vignisson (sign)
Páll Marvin Jónsson (sign)
Trausti Hjaltason (sign)
Birna Þórsdóttir (sign)






Liður 4 var samþykktur með sex atkvæðum. Stefán Óskar Jónasson greiddi atkvæði á móti.
Liðir 1-3 og 5 voru samþykktir með sjö samhljóða atkvæðum.

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159